[2]
Die coninc Nabugodonosor, die men Cambises noemt, die toech daerna in Egypten ende wan al dat lant. Ende hi maecte een stat ende noemdese Babilonyen. Ende daerna wort hi siec. Ende hi wort gebrocht in Damas ende daer bleef hi doot. Ende hi en liet geen knechten after, mer hi liet na hem een dochter, die hiet Panteyge.
Ende daer was een heer in Percen, die hiet Armeydes. Die nam des conincs dochter Panteyge ende was coninc 7 maenden. Ende doe sterf hi.
Ende daerna wort sijn brueder coninc, die hiet Mergedes. Ende daer waren seven heren die dat lant van Percen ende van Meden, van Assyrien regierden onder den coninc Cambyses. Die 7 heren vernamen dat Margedes geen oren en hadde, want Cambises hadse ofgesneden. Doe swoeren die 7 heren tesamen ende slogen Mergedes doot, doe hi coninc geweest hadde vijf maenden. Ende si namen onder hem sevenen Panteyge in haer bewaringhe
Explicit Judith.
Hoc opus exegi, Cristo sit gloria Regi.
Et sic est finis, sit laus et gloria Trinis.
Hieran volcht Esdras.
Auteursrechtelijk beschermd