Noordnederlandse Historiebijbel

[5]

Doe wort Elmeradach coninc van Babylonyen, die van sinen vader in den kercker geleit was by Jeconias, die coninc van Jherusalem, die doe daer

[fol. 210ra]

38 jaer in den kerker gelegen hadde. Doe dese Elmeradach coninc was, doe dede hi Yeconyas uut den kercker ende maecte hem sijn overste raet van Babylonyen, omdat hi mit hem in den kerker gelegen hadde. Omdat Nabugodonosor een beest geweest hadde ende was weder een mensche geworden, so duchtede sinen soen Elmeradach dat hi weder van den doot verrisen mocht. Ende bi rade van Yeconyas so dede hi sinen vader opgraven ende dede sijn lichaem snyden an 300 stucken ende dede dat geven 100 vogelen te eten, omdat hi ymmer niet weder en verrese van der doot.

Dese Elmeradach hadde 3 kinderen. Ende doe hi starf, doe wort sijn outste soen coninc na hem van Babylonien ende was genoemt Reguser. Ende na Reguser so wort sijn ander soen coninc van Babilonyen, die genoemt was Laborsardoch. Ende na Laborsardoch so wort die joncste soen coninc van Babilonyen, die genoemt was Balthaser. Ende die Balthaser was een rijc, machtich coninc van Babylonien.