Noordnederlandse Historiebijbel

[2]

Doe Jheremias doot was, doe voer Nabugodonosor ende wan dat lant van Moab ende dat lant van Ammon ende toech doe in Egipten ende wan dat lant ende versloech den coninc ende settede een coninc van sijnre hant. Ende hi nam die joden uut Egipten ende voerdse gevangen in Babilonien, als Jheremyas voirseit hadde. Doe waren meest alle die joden gevangen. Ende die rijcste ende die machtichste die lagen meest in kerkeren. Ende dat gemeen volc die waren verstroeyt over al dat gemeen lant ende mosten arbeiden. Daer was mede gevangen Ezechiel, die propheet. Die ghinc over al dat lant ende troestede die gevangen, dat si die geboden ende die wet houden souden. Ende hi propheteerde ende voirseide dat cruce ons Heren ende dat doepsel ende die verrisenis des vleis ten joncsten dage. Ende hi voirseide plagen onder die kerstenen van Gog ende van Magog ende hoe si verslegen souden worden.

Op een tijt was Ezechiel in Caldeen. Ende die heydenen vervolchden hem ende wouden hem verslaen. Doe dede hi mit sinen gebede dat water ende die rivier Cober sceiden ende al

[fol. 207ra]

stille staen ende ghinc daer mit drogen voeten over. Ende die hem vervolchden ende slaen wouden, die verdroncken in die rivier.

Op een tijt doe beruspede die propheet Ezechiel die joden ende verboet hem dat si geen afgoden anbeden en souden ende houden die geboden ende die wet Gods. Ende sonderlinge so beruspede hi die van Gads geslacht. Ende doe slogen si hem ende staken hem. Doe seide Ezechiel: "Alle diegene die die wet Gods niet en houden, die en sellen nymmermeer weder te lande keren." Doe worden die joden toornich ende verwoet ende sleepten den propheet Ezechiel mit enen paerde over stenen ende over struken, soedat dat breyn uut sinen hoefde liep ende bleef doot. Ende doe wort hi begraven bi Sem, Noen outsten soen.

Explicit.

Et sic est finis, sit laus et gloria Trinis.

Scriptor scripsisset bene melius, si potuisset.

Qui scripsit scripta, sua dextera sit benedicta.

Hoc opus exegi, Cristo sit gloria Regi.

Hieran volget van Daniel, den propheet.

[fol. 207rb]