Noordnederlandse Historiebijbel

Van Ozias, den coninc van Juda ende van Jherusalem. Capittelo 15

Ozias was 16 jaer out doe hi coninc wort van Judeen. Ende hi regneerde 52 jaer in Jherusalem. Ende sijn moeder hiet Yechelya van Jherusalem. Hi wanderde in den wech Gods, als Amasyas, sijn vader, eerst dede. Ende hi minde God boven al.

Ende hi vergaderde sijn volc ende vacht jegen die Filisteen. Ende hi wan Geth ende destrueerde die mueren. Ende oec wan hi Jamme ende Azoth. Ende hi maecte steden onder die Philisteen. Ende God halp hem jegen die Philisteen ende die van Arabien ende jegen die Ammonyten. Ende die Ammonyten settede hi tot tribuyt onder Jherusalem. Ende Ozias maecte enen toorn in Jherusalem op die Hoeckpoort. Ende hi maecte enen toorn op die

[fol. 187rb]

Poort in den Dael. Ende hi maecte al die mueren van Jherusalem weder. Ende hi maecte oec enen toorn in der woestinen ende dalf daer voel putten ende cysternen sijn beesten uut te drinken, want hi hielt in der woestinen ende in den ackeren voel beesten. Ende hi hadde in den gheberchten voel wijngaerden ende voel ackerluden. Oec hadde hi voel princen die mit sinen volc te stride voeren, wel 2.000. Ende elc hadde volc onder hem die bereet waren te striden.

Ende die coninc Ozias die bereide hem scilden ende speren ende helmen ende harnas. Oec maecte Ozias in dien toornen van Jherusalem menigherhande instrument mede te scieten, te worpen ende te vechten. Ende Ozias naem was verre ontsien, omdat God mit hem was ende hem stercte. Doe hem God aldus stercte, doe verhief hem sijn herte ende vergat den almachtigen God. Ende hi ghinc in den tempel Gods ende nam daer an den dienst der priesteren ende woude Gode sacrificie doen. Ende die priester Azarias mit 70 priesteren die volchden hem na ende si beruspeden hem ende seiden: "Ozias, dien dienst die hoert den priesteren toe te doen die van Aaron gecomen sijn ende die geheilicht sijn tot dien dienst. Daerom, gaet uut

[fol. 187va]

der sanctuarien, want hier en heb gi van Gode geen eer of." Doe was Ozias toornich. Hi hadde in sijn hant een wyeroecvat om Gode sacrificie te doen. Ende rechtevoert quam die malaetscheit in sijn voerhoeft, daer hi stont voer dat outaer. Doe die biscop Azarias ende die ander priesteren die malaetscheit in sijn voerhoeft sagen, doe verdreven si hem haestelic uut den tempel. Ende Ozias was vervaert ende ghinc haestelic uut den tempel, omdat hi so haestelic geplaecht was. Ende hi bleef malaets al sijn leven lanc. Ende hi bleef uut den volc. Ende Joathan, sijn soen, die regierde dat conincrijc ende hi berechtede dat volc.

Ozias woerden ende wercken die sijn bescreven in Ysayas ende Amos, der Propheten boken. Ende doe hi sterf, doe wort hi begraven in Davids stat. Ende Joathan, sijn soen, regierde na hem.

Hec 2o Paralipomenon, capittelo 26.

Onder Ozias tiden doe was Sardanapelus coninc van Assyrien ende Arbaces was sijn maerscalc. Ende Sardanapelus die sat mit sijn amyen in een camer gecleet als een wijf ende en most niet doen dan die wiven wouden. Ende Arbaces die hadde mit hem te spreken ende quam in die ca\mer

[fol. 187vb]

ende sach hem sitten als een wijf. Doe wort Arbaces gram ende seide: hi en woude genen coninc dienen die hem regierde als een wijf. Ende Arbaces seide dat den ridderen. Ende doe coren si hem tot een coninc van Assyeryen. Ende dat vernam Serdanapelus. Ende hi stac die camer ende dat hof an daer hi in was, ende verbarnde hemselven mit al sijn wiven.

Van Sacharias, den coninc van Ysrahel

In Ozias, coninc van Ysrahel, 38ste jaer doe was Zacharias coninc van Ysrahel 6 maenden lanc ende woende in Samarien. Ende hi sondichde voer Gode als sijn voirvaderen deden. Ende hi en sceide niet van Jeroboams sonden. Ende daer quam een, genoemt Sellum, Jabes soen. Die swoer jegen hem. Ende hi sloech hem openbaerlic doot ende regneerde na hem. Die woerden ende die werken van Sacharias die sijn bescreven in der Propheten boeken. God die sprac tot Jehu ende seide: "Ju kinderen sellen totten vierde geslacht toe besitten dat rijc van Ysrahel. Ende dat es nu gedaen."

Van Sellum, coninc van Ysrahel

In Ozias 39ste jaer doe regneerde Sellum over Ysrahel een maent ende woende in Samarien. Ende doe quam Manahem, Gaddijs soen van Thercen, in Samarien ende sloech Sellum doot ende regneerde na hem. Ende Sellums woerden ende

[fol. 188ra]

sijn conjuracien ende sijn lagen die hi leide, die sijn bescreven in der Propheten boken.

Ende Manahem wan Tapsan ende versloech alle die daerin waren. Ende hi regierde Ysrahel 10 jaer ende woende in Samarien. Ende hi volchde Jeroboams leven na ende dede dat volc van Ysrahel sondigen.

Doe quam Phul, die coninc van Assyrien, in Thersen. Ende Manahem die gaf den coninc Phul 1.000 talenten sulvers, omdat hi hem helpen soude ende vestigen hem in sijn rijc. Ende Manahem, die coninc van Ysrahel, die settede op die princen ende op die rike van Ysrahel een tribuyt, dat si alle jaer den coninc van Assyrien souden geven: 50 syclos sulvers. Oec so loefde Manahem den coninc van Assyrien: woude hi uut sinen lande thuys trecken, hi soude hem senden die gulden calveren die Jeroboam hadde doen maken. Ende doe toech die coninc van Assyrien uut Thersen. Ende doe sende Manahem den coninc van Assyrien die gulden calveren. Ende doe die coninc Phul die calveren besach, doe waren si coperen ende daerop vergult, want die papen die hadden die gulden calveren gestolen ende setteden die coperen weder in die stede. Doe wort die coninc van Assyrien toornich ende bleef doe altoes nydich op dat rijc van Ysrahel.

Al

[fol. 188rb]

Manahems woerden ende wercken die sijn bescreven in der Propheten boken. Ende doe Manahem doot was, doe wort hi begraven in Samarien. Ende Phaceya, sijn soen, die regneerde na hem.

Van Phaceya, coninc van Ysrahel

In Ozias vijftichste jaer doe wort Phaceya coninc van Ysrahel ende regierde twee jaer ende woende in Samarien. Ende hi volchde Jeroboams leven na in sonden. Doe hadde hi onder hem een hertoge. Die hiet Phacee ende was Romelien soen. Die hertoech swoer jegen sinen heer ende versloech hem in Samarien in des conincs hof ende regneerde na hem. Ende Phaceyen wercken ende woerden die sijn bescreven in dien Boec der coningen van Ysrahel.

Van Phacee, coninc van Ysrahel

In Ozias 52ste jaer doe wort Phacee coninc van Ysrahel ende regierde 20 jaer ende woende in Samarien. Ende hi sondichde voir God ende volchde Jeroboams leven na in sonden.

Ende onder Phacee, den coninc van Ysrahel, so quam Teglatphalaser, die coninc van Assyrien, ende wan in Ysrahel Ayon, Abel Maacha, Janoe, Cedes, Asor, Galaad, ende voel steden in Galileen, ende vinc al dat volc. Ende oec vinc hi al dat lant van Neptalim ende voerdese gevan\ghen

[fol. 188va]

in Assyrien. Dat was dat beghinsel van der gevangenis van Ysrahel. Die woerden ende wercken Phacee die sijn bescreven mit die Coninghen van Ysrahel.

Ende doe Phacee 20 jaer gheregiert hadde dat rijc van Ysrahel, doe quam Ozee, Helaens soen, leide lagen na hem ende sloech hem doot ende regneerde na hem in Ysrahel.

Van Joathan, den coninc van Judeen ende van Jherusalem, Ozias zoen.

In Phaceen, coninc van Ysrahel, anderde jaer doe wort Joathan coninc van Judeen ende van Jherusalem, doe hi 25 jaer out was. Ende hi regierde 16 jaer ende woende in Jherusalem. Ende sijn moeder hiete Jerusa ende was Sadochs dochter. Ende hi leefde rechtvaerdelic voir Gode, als Ozias, sijn vader, dede, mer hi en ghinc niet in den tempel om den dienst der priesteren te doen. Hi tymmerde te Jherusalem die Scoen Poort, die Speciosa hiet. Ende in der mueren maecte hi voel toornen. Ende int gebercht van Juda so maecte hi voel castelen ende toornen. Ende hi vacht ende street jegen die van Ammon ende verwanse. Ende die van Ammon die senden hem jaerlics te tribuyt 100 talenten sulvers ende 10.000 hoet tarwen ende oec also voel gersten. Dat gaven hem die Ammonyten in dat ander ende in dat dorde jaer. Ende Joathan was ontsien, omdat hi

[fol. 188vb]

rechtvaerdelic wanderde in den wech Gods. Alle die woerden ende werken van Joathan die sijn bescreven int Leven der Coninghen boken. Ende doe hi sterf, doe wort hi begraven in Davids stat. Ende Achas, sijn zoen, die regneerde na hem.