Noordnederlandse Historiebijbel

19 capittel

Doe seide Achab tot Yesabel, sinen wive, al dat opten berch gesciet was ende hoe Helyas haer propheten hadde doen doden. Doe sende Jesabel boden tot Helyas die seiden dat si morgen Helyas soude doden, ghelijc dat hi haer propheten gedoot hadde.

Doe was Helyas vervaert ende toech uut Ysrahel in Judeen in een stat, hiet Barsabee. Daer liet hi dat kint Jonas. Ende hi ghinc alleen een dachreyse in der woestinen ende ghinc doe sitten onder een gengevaerboem ende begheerde te sterven ende seide: "Here, het is mi genoech dat Gi mijn siel van mi haelt. Ic en ben niet beter dan mijn vaders geweest hebben." Ende doe ghinc Helyas leggen slapen in die scade van dien boem. Ende siet, die engel Gods quam ende roerde hem ende seide: "Helyas, stant op ende eet." Ende doe rechte hem Helyas op ende sach tenden sinen hoefde

[fol. 169rb]

staen een vat mit water ende broet, onder die assche gebacken. Ende Helyas die at ende dranc ende sliep weder. Doe quam die engel Gods anderwerf weder ende roerde Helyas ende seide: "Staet op ende eet. Gi hebt noch enen verren wech te gaen."

Doe stont Helyas op ende at ende dranc ende wanderde in stercheit der spisen 40 dagen ende 40 nachten tot den berch Gods, Oreb. Dat was den berch Synay. Ende doe hi daer quam, doe rustede hi in een spelunc. Ende siet, daer sprac een stemme tot hem ende seide: "Helya, wat doe gi hier?" Doe seide Helyas: "Omdat ic mijn Heer, mijn God, gemint hebbe, so benyden my die van Ysrahel, want si hebben uwen vrede aftergelaten ende uwe outaren gebroken ende uwe propheten gedoot. Ende ic ben alleen ontgaen ende si soken my om te doden."

Doe seide God tot Helyas: "Gaet ende keert weder doir die woestijn in Damasco. Ende als gi daer coemt, so sel gi Azael daer coninc salven van Zyryen. Ende Jehu sel gi coninc salven van Ysrahel. Ende Helyseus sel gi propheet salven voir u. Ende so wie dat Azaels swaert ontgaet, die sel Jehu verslaen. Ende so wie dat wijct voir Jehus swaert, die sel Helyseus verslaen. Ende ic sel laten in Ysra\hel

[fol. 169va]

7.000 mannen die haer knyen niet gebogen en hebben voir dat afgod Baal. Ende alle die mont die hem niet angebeet en hebben, die sal men haer hant cussen."

Doe ghinc Helyas vandaen uut der woestinen ende vant Helyseum in den acker mit 12 paer ossen. Doe Helyas bi hem quam, doe leide hi sinen mantel op Helizeum. Ende hi liet rechtevoert sijn ossen ende volchde Helyas na ende seide tot hem: "Ic bidde u: laet mi mijn vader ende mijn moeder eerst gaen cussen ende oerlof an hem nemen. Dan sel ic u volgen." Doe seide Helyas: "Gaet ende coemt weder tot my." Doe ghinc Helyseus van Helyas ende nam twee ossen ende sloech die, ende koecte dat vleis ende at dat mit sinen vrienden ende gesondese ende sciet van hem. Ende doe volchde hi Helyas na ende diende hem.