Noordnederlandse Historiebijbel

11 capittel

Het is daerna gesciet, doe dat coren rijp was, doe sende David Joab, sijn maerscalc, mit een groet heer van Ysrahel in dat lant van Ammon ende belach die hoeftstede van Rabbath. Ende David hadde na den middach geslapen ende stont op ende ghinc wanderen langes den solre. Ende hi sach tot enen veynster uut dat een wijf haer dwoech in enen boemgaert. Ende dat wijf was seer scoen. Doe sende daer coninc David boden om te besien wat wijf dattet was. Het wort hem geseit, dat het was Barsabee, Uryas wijf. Doe sende David een bode tot haer, dat si tot hem comen soude. Ende Barsabee quam tot coninc David. Doe geerde David dat si bi hem sliep, mer si en woudet niet doen. Mer David en woudese niet vry laten gaen. Doe seide Barsabee: woude hi haer loven, waert dat hi kint an haer wonne, dat dat kint sijn rijc na hem besitten soude? Doe loefde David haer dat. Ende doe bleef

[fol. 136ra]

si daer. Ende Nathan, die propheet, die kende dat in den geest ende ghinc tot David om die sonden te benemen. Ende dat benyde die duvel ende leide een doot naect mensche in den wech des propheten. Doe dochte die propheet: hi woude dien mensche begraven ende dan totten coninc gaen. Doe groef Nathan die doden mensche. Ende doe hi in des conincs hof quam, doe was die sonde gedaen. Ende doe Barsabee in haer huys was, doe ontboet si David heymelic dat si kint ontfangen hadde.

Doe David dat vernam, om die sonden te bedecken ende dat wijf in eren te bliven, so ontboet hi Joab dat hi den ridder thuys senden soude. Doe sende Joab Uryas tot David. Doe vraechde David Uryam hoe dattet int heer stont. Doe seide Uryas dat si menichwerven uut der stede quamen starckelic striden. Doe seide David tot Uryas: "Gaet in u huys ende dwaet uwe voeten ende doet u te gemac." Uryas ginc uut des conincs camer ende bleef des nachts mit des conincs knechten in die sael slapen ende en ghinc niet tot sinen huse. Ende dat wort David geseit, dat Uryas niet tot sinen huse gheweest en hadde. Doe seide David tot Uryas: "Gi sijt van enen verren wech gecomen. Waerom en gae gi niet thuus ende doet u selven gemac?" Doe seide Uryas

[fol. 136rb]

tot David: "Die arke Gods ende kinder van Ysrahel ende van Juda die wonen in tenten ende in paulioenen. Ende Joab, mijn heer, en al sijn gesin die rusten op der aerden. Ende soude ic in mijn huys gaen eten ende drinken ende slapen bi minen wive? Here coninc, bi uwer genaden so en sel ic dat niet doen." Doe seide David: "So blijft hier huden ende morgen. Ende dan sel ic u laten varen." Doe bleef Uryas in Jherusalem noch 2 dagen ende sliep des nachts in des conincs sael. Ende doe ontboet David Uryas, dat hi mit hem soude eten. Ende Uryas at ende dranc mit den coninc. Ende hi was droncken ende bleef des avonts slapen in des conincs sael bi des conincs knechten ende en ghinc niet thuys. Des morgens doe dat David vernam, doe screef hi enen brief an Joab dat hi Uryas voir in den strijt soude setten jegen die stercste van der steden, opdat hi verslegen mochte worden. Ende dien brief die droech Uryas selve tot Joab.

Doe Joab desen brief gelesen hadde, doe settede hi Urias voer die poert daer die stercste mannen uut quamen striden. Ende doe quamen si uut der steden ende vochten jegen die van Ysrahel. Ende si verslogen daer een deel volcs. Ende daer bleef Uryas mede doot. Doe sen\de

[fol. 136va]

Joab een bode tot David hoet in den strijt vergaen was. Ende hi seide hem hoe dat hi seggen soude. Doe ghinc die bode tot den coninc ende hi vertelde hem, alsoe als hem Joab geseit hadde. Ende oec so seide hi hem hoe dat si uut der stede quamen vechten. Ende die van Ysrahel jaechdense weder in die stede ende volchden hem an die muer. Ende die scutters van der mueren die scoten die somme van Ysrahel doot. Ende daer bleef Uryas mede doot voer der poorten. Doe seide David tot den bode: "Segt Joab dat hi sijn volc spaer ende sinlic striden, opdat hi sijn volc spaer ende niet en quist."

Doe verhoerde Barsabee dat Uryas, haer man, doot was. Doe bescreide si hem een tijt ende was bedroeft. Ende doe die tijt des screyens ende des rouwes gedaen was, doe nam coninc David Barsabee tot enen wive binnen sinen huse. Ende dat mishagede God. Ende daerna doe brocht Barsabee een kint ter werelt ende dat was een knechtgin.