Noordnederlandse Historiebijbel

6 capittel

Doe vergaderde David die edelste van Ysrahel, 30.000, bi hem ende toech daermede om die arke Gods te halen. Ende doe si quamen in Gabaa tot Aminadap, doe namen die levyten die arcke ende settense op enen nyeuwen wagen. Ende Amynadaps twee kinderen, Osa ende Hayo, die leden die ossen in den wagen. Ende coninc David mit veel heren die ghingen daer voir die arke Gods ende speelden op harpen ende op sanctorien, op bongen ende op ander trompetten. Ende doe si quamen in Achors acker, daer ghinc die wagen in een put. Ende Oza meende dat die arcke vallen soude ende stac daer sijn hant an. Ende hi bleef vlus doot. Doe was David bedroeft, omdat Oza also doot bleef ende en dorste die arke in sijn stede niet brengen, mer hi lietse daer in eens mans

[fol. 133va]

huys van Levijs geslacht die hiet Obededom. Ende daer bleef die arke drie maenden ende God die gebenedide Obededom ende al sijn huusgesin. Ende dat wort coninc David geseit.

Doe vermaecte coninc David die tabarnakel die Moyses hadde doen maken, want si out was, ende settese in Jherusalem. Ende doe ghinc David mit die levyten ende mit die eerbaerste van Jherusalem tot Obededoms huys ende haelden die arck ende brochtense mit vroechden in Jherusalem. Ende David ghinc voir die arke ende voel gesins mit hem mit herpen, mit sanctorien, organen ende ander snaerspul. Ende David hadde een linnen cleet an, als ephod, ende was opgescort. Ende doe men die arke brocht binnen Jherusalem, doe sach Mycol tot enen veynster uut ende sach David opgescort gaen ende sanc ende spranc ende speelde voer die arke Gods. Ende doe spottese mit hem in haerre herten.

Doe settede David die arke in die tabarnakel. Ende David ende al dat gemeen volc offerden daer haer giften ende offerhanden. Ende doe gebenedide hi dat volc in den naem Gods ende gaf een ygelic mensche, mannen ende wiven, elc een dinne stictgin broets mit

[fol. 133vb]

wat olyen. Ende doe ghinc een ygelic mensche tot sinen huse.

Doe maecte David dien psalm: Afferte Domino, filii Dei, afferte Domino filii arietum; afferte Domino gloriam et honorem. Kinderen Gods, aendraecht den Here, kinderen der wederen aendraecht den Here; aendraecht den Here glori ende eer. Ende dien psalm voert.

Doe David tot sinen hove quam, doe ghinc hem Mycol yegen ende seide tot hem: "Hoe vrolic was die coninc van Ysrahel huden, ende was opgescort ende spranc ende speelde voer die dienre sijnre knechten ende was ghecleet gelijc een nettenbove." Doe seide David tot Mycol: "God weet dat, dat ic voer hem speelde tot sijnre eren, omdat hi my vercoes voer uwen vader ende voer al sijn gesin, dat ic een heer soude wesen van al die van Ysrahel. Daerom sel ic God eren ende veroetmoedigen mi voer Hem. Ende voer die dienren daer gi of segt, sel ic mi vroliken openbaren. Omdat Mycol, Sauls dochter, David so scarpelic toesprac, so en creech si geen kinder bi hem. Mer in haer leste jaer doe droech si kint ende daer bleef si of doot.