Noordnederlandse Historiebijbel

3 capittel

[fol. 131rb]

Ende het was daerna lange oerloge ende strijt tusschen Sauls gesin ende Davids gesin. Ende Davids macht meerrede altoes ende Ysboseths macht die minderde. Ende David die worden kinderen geboren in Ebron. Sijn outste soen dat was Ammon. Sijn moeder was Achynoem. Die ander hiet Celaab. Sijn moeder was Abygayl. Die dorde was Absalon. Sijn moeder hiet Maacha, des conincs dochter van Gessur. Die vierde hiet Adonyas. Sijn moeder hiet Aggith. Die vijfte hiet Saphatias. Sijn moeder hiet Abythal. Die seste hiet Getram ende sijn moeder hiet Agla. Die kinder waren David geboren in Ebron.

Dat oerloghe stont langhe tusschen David ende Ysbozeth. Abner was Ysboseths maerscalc. Ende Saul hadde een wijf, hiet Respha; daer sliep Abner bi. Doe seide Ysboseth tot Abnar: "Waerom slaep gi bi mijns vaders biwijf?" Doe wort Abner seer toornich op Ysboseth ende seide: "Ben ic niet die u dat hoeft ophout jegen die van Juda? Ende ic heb uwes vaders huys opgehouden ende ontfermherticheit over sijn kinderen getoent. Ende ic mocht u in Davids handen gelevert hebben. Ende waerom

[fol. 131va]

beruspe gi mi van enen wive ende ic heb u staende gehouden? Ende God heeft geseit, hi sel dat rijc van Ysrahel halen van Sauls huys ende gevent David." Ende doe was Ysboseth vervaert ende en sprac niet meer. Doe seinde Abner boden tot David die seiden: "Wil gi Abner in vrientscappen ontfangen, hi sel u here maken over al Ysrahel." Doe seide David: "Ic wil hem wel in vrientscap ontfangen, mer des moet hi mi Mycol, mijn wijf, senden, die ic verdiende mit dat ic 100 Filisteen versloech, eer hi voir mijn ogen comt." Doe sende David boden tot Ysboseth die seiden dat men David sijn wijf, Mycol, senden soude. Doe nam Ysboseth Mycol, sijn suster, van Fatiel, den man die haer gegeven was, ende sendese David. Ende Fathyel, haer man, screyde ende volchde haer nae tot Bahur. Doe seide Abner tot hem: "Laet dat wijf gaen ende keert weder thuyswaert."

Doe seide Abner tot die outste van Ysrahel: "Gisteren ende eergisteren doe begeerde gi David te hebben tot enen coninc; volbrenct dat nu, want God heeft geseit: `In den handen mijns knechts Davids sel Ic mijn volc ver\lossen

[fol. 131vb]

van die Philisteen ende van al haren vianden.'" Die van Ysrahel seiden: si wouden dat volbrengen. Doe ghinc Abner tot David in Ebron mit 20 man. Ende David ontfinc hem in vrientscappen ende maecte hem een groet maeltijt. Doe die maeltijt gedaen was, doe seide Abner tot David: "Here coninc, ic sel gaen vergaderen voer u al die van Ysrahel. Ende si sellen u onderdaen wesen na uwen willen." Doe sciet Abner van David mit sinen volc. Ende doe quam Joab uut der woestinen mit sinen volc ende had een deel moerdenaers ende rovers verslegen, ende brochten enen groten roef. Ende doe wort Joab geseit dat Abner tot David geweest hadde ende dat David hem in vrientscappen ontfangen hadde. Doe ghinc Joab tot David ende seide: "Wat heb gi gedaen? Abner heeft tot u geweest ende gi hebt hem mit vrientscappen van u laten gaen. Weet gi niet dat hi hier quam om te verspien ende om te besien hoet in u hof gestelt was, ende uwen uutganc ende uwen inganc te besien?" Doe ghinc Joab van David ende sende boden na Abnar, dat hi wedercomen soude, mer David en wist daer niet of. Doe quam Abner weder in Ebron ende Joab nam hem an een side, recht of hi mit

[fol. 132ra]

hem lusteren woude. Ende hi stac hem doer sinen hals, dat hi daer doot bleef, ende wrac also Asahel, sinen brueder.

Doe David die moert vernam, doe seide hi: "Ic ende alle mijn rijc is vry van Abners bloet. Ende dat bloet sel comen op Joab ende op sijns vaders huysgesin." Doe seide David tot Joab ende tot al den volc dat mit hem was: "Scoert uwe clederen ende doet sacken an ende screyt over Abner." Coninc David die volchde die baer, doe men Abner ten grave droech. Ende David screide op dat graf ende oec screyde dat gemeen volc. Doe men ter maeltijt soude gaen, doe seide David dat hi niet eten en soude, eer die sonne onder waer. Ende doe dat gemeen volc dat hoerden, doe bekenden si wel dat David geen scult en hadde tot Abners doot. Doe seide David: "Servye mijnre suster kinderen die sijn my te hert. God selse noch na haerre quaetheit lonen."