Noordnederlandse Historiebijbel

2 capittel

Daerna doe vraechde David Gode raets ende seide: "Here God, sel ic in enige stede van Juda trecken?" Hem wort geandwoert: "Ja." Doe seide David: "Waer sel ic trecken?" Hem wort geandwoert: "In Ebron." Doe toech David mit sijn twee wiven, Achynoem ende Abygayl, ende mit die mannen die mit hem waren. Ende si woenden daer in Ebron. Ende doe quamen die mannen van Juda ende coren David tot enen coninc over dat geslacht van Juda.

Doe maecte David desen psalm: Dominus regit me et nichil michi deerit in loco pascue ibi me collocavit. Die Here regiert mi ende mi en sel niet gebreken in die stat der weyden daer hi mi in settede. Ende dien psalm al uut.

Abner, Sauls maerscalc, die nam Sauls soen Ysboseth ende maecte hem coninc over al Ysrahel. Ende hi was 40 jaer out. Ende hi regierde twee jaer. Ende David was heer over dat geslacht van Juda ende woende in Ebron seven jaer

[fol. 130vb]

ende ses maenden.

Doe ghinc Abner, die Sauls maerscalc was ende was nu Ysboseths maerscalc. Hi nam dat volc van Ysrahel mit hem ende toech daermede te stride in Gabaon. Ende Joab, Davids maerscalc, die nam die van Juda ende quam daermede in Gabaon op der piscinen. Ende dat een heer was op die een side van der piscinen ende dat ander heer was op die ander side. Doe seide Abner tot Joab: "Laet een deel van onsen volc jegen malcander scheermutsen voir ons." Doe seide Joab: "Wel, latet geschien." Doe scicte Abner 12 mannen van Benyamins geslacht van Ysboseths gesin ende Joab scicte daerjegens 12 mannen van Judas geslacht van Davids gesin. Ende die 12 mannen die vochten jegen malcander van elke zide ende si verslogen alle malcander. Ende doe geviel daer enen stercken strijt. Ende ten lesten doe vloech Abner mit sijn volc ende Joab vervolchde hem mit sijn volc. Ende David die hadde daer 3 susterkinderen, als Joab, Abysay ende Asahel. Ende Asahel die was snel int lopen als een gheit in een bussche. Ende Asahel die vervolchde Abner ende hi en vercoes anders nyement. Doe keerde hem Abnar omme ende seide: "Sie gi dat, Asahel?" Asahel seide: "Ja, ic." Doe seide Abnar: "Gaet van mi ter rechterside of ter lufterside ende verkiest enen jonge\linc

[fol. 131ra]

ende verslaet hem ende neemt hem sijn harnas." Mer Asahel en woude van Abner niet sceiden, mer hi vervolchde hem. Doe seide noch Abner tot Azahel: "Gaet van my ende en vervolcht my niet, opdat ic u niet en versla." Ende Asahel versmade die woerden ende en ghinc niet van Abner. Doe keerde hem Abner omme ende stac Asahel doer sijn lichaem mit sinen speer, sodat hi doot ter aerden viel.

Doe vervolchden Joab ende Abysay Abner totter sonnen onderganc toe. Ende Abner weec op enen hogen berch ende daer quamen die van Benyamin bi hem. Doe riep Abner tot Joab ende seide: "Waerom vervolch gi ons aldus? Sie gi niet dat wi in anxten ende in wanhoep sijn? Segt uwen volc dat si oflaten haer bruederen te vervolgen." Doe seide Joab: "Hadt gi dat huden geseit, wi en hadden ons bruederen niet vervolcht." Doe blies Joab een trompet. Doe bleef sijn volc staen ende en vervolchden niet meer die van Ysrahel. Doe toech Abnar mit sinen volc thuuswaert. Ende Joab sach sinen volc over. Ende doe hadde hi 19 mannen aftergelaten, behalven Azahel, sijn brueder. Ende van Abners gesin waren verslegen 300 ende 60 mannen. Ende Joab die toech al den nacht mit sinen volc ende quam in Ebron. Ende hi begruef Asahel, sijn brueder, in sijns vaders graf in Bethleem.