Noordnederlandse Historiebijbel

16 capittel

God, die Here, die seide tot Samuel: "Waerom screy gi over Saul, ende Ic heb hem verworpen, sodat hi over Ysrahel niet meer regneren en sel? Mer volt uwe horen mit oly ende coemt. Ic sel u senden tot Ysay in Bethleem. Ic heb onder sine kinderen Mi enen coninc voirsien." Doe seide

[fol. 118rb]

Samuel: "Hoe soude ic daer gaen? Ende hoerde dat Saul, hi sloech mi doot." Doe seide God: "Neemt enen groten os an uwen handen ende segt: Ic ben hier gecomen om Gode te offeren. Ende roept Ysay dan totter offerhande. Ende dan sel Ic u tonen wat gi doen selt. Gi selt dengenen salven die Ic u wise."

Samuel dede als hem God beval te doen. Hi quam in Bethleem. Ende die outste des volcs van der stede die quamen hem jegen ende seiden: "Gaet hier niet in." Doe seide Samuel: "Ic coem hier om Gode te offeren; coemt mede ter offerhande." Ende doe quam daer Ysay mit sinen kinderen. Ende doe die offerhande gedaen was, doe sach Samuel Ysays outste soen, die lanc ende groet ende scoen was. Die woude hi coninc salven. Doe seide God tot Samuel: "Siet niet an dat scoen aensicht van Elyab noch oec sijn groetheit. Hi en sel die coninc niet wesen, want oerdelt niet na sijn scoenheit of groetheit mer na dat herte ende die doechden der menschen." Doe brocht Ysay sinen anderen soen, Abynadap, voir Samuel.

[fol. 118va]

Doe seide Samuel: "Desen en hevet God niet vercoren." Doe brocht Ysay Samma, sinen dorden soen. Doe seide Samuel: "Desen en hevet God oec niet vercoren." Also brocht Ysay al sijn seven kinderen voir Samuel.

Doe seide Samuel: "God en hevet geen van desen kinderen vercoren. Heb gi niet meer kinderen?" Doe seide Ysay: "Daer is noch een jonc opten velde ende wacht die scapen." Doe seide Samuel: "Sent om den jongen ende laet hem hier comen." Doe seinde Ysay om David ende hi quam voer Samuel. David was roet van vorwen, scoen ende genoechlic int aensicht. Doe seide God tot Samuel: "Staet op ende salft desen. Hem heb Ic vercoren." Doe nam Samuel den horen mit der olye ende salfde David coninc voer al sijn bruederen. Ende die geest Gods quam in David op dien dach ende bleef altoes in hem. Ende doe ghinc Samuel weder in Ramatha.

Doe ghinc die geest Gods van Saul ende in hem quam een quaet geest. Ende daer wort hi of gequelt. Doe seiden die knechten tot Saul: "Siet, here, dat is een quaet geest die u aldus quelt. Daerom, laet een mensche soken die spelen can mit suet snaerspul. Gi seltet te lichter hebben, want die somme quade geesten die en mogen die soeticheit

[fol. 118vb]

van den snaerspul niet horen." Doe seide Saul: "Siet om een mensche die spelen can ende brenct die voir mi mit sinen snaerspul." Doe seide daer een van Sauls knechten: "Ysay van Bethleem die hevet enen soen die can wel herpen. Hi is cloec ende sterc ende een oerloechsman ende wijs in sinen woerden ende scoen van vormen. Ende God, die Here, is mit hem." Doe seinde Saul boden tot Ysay ende seiden: "Sent David, u soen, tot Saul mit sijn herpe, opdat hi hem wat verlichten mach." Doe nam Ysay enen ezel, ende leide daerop broet ende een vlesch mit wijn ende een gheyt ende een buck, ende sende David also tot Saul.

Ende doe David also voir Saul stont, doe speelde hi op der herpen. Ende doe wort Saul verlost. Ende daerom minde Saul David ende maecte hem sijn sciltknecht. Ende hi sende boden tot Ysay die seiden: "David die sel bi Saul bliven ende staen voir sijn aensicht, want hi hevet gracie vercregen voir sinen ogen." Ende tot wat tijt dat Saul gequelt wort van den quaden geest, so nam David sijn harp ende speelde daerop. So wort hi vertroest ende verlicht. Ende die quade geest sceide van hem. Ende dan ghinc David weder tot Ysay, sinen vader.