Noordnederlandse Historiebijbel

4 capittel

Ende het is gesciet in dien dagen dat die Philisteen quamen vechten op die kinder van Ysrahel. Ende die van Ysrahel vergaderden een heer ende togen te stride jegen die Philisteen. Ende die Filisteen verslogen wel 4.000 mannen van Ysrahel ende verjaechden die ander. Doe seiden die outste van die kinder van Ysrahel: "Waerom mach dit wesen dat wi aldus seer verslegen worden van die kinder der Filisteen? Laet ons die arcke Gods halen uut Sylo ende voerense mit ons te stride, opdat God ons verlosse van onsen vianden." Doe toech daer een deel volcs in Sylo ende brochten die arke Gods mit hem. Ende Helijs twee kinderen die quamen mede, Ofny ende Finees. Ende doe die kinder van Ysrahel die arcke in haer heer brochten, doe worden die van Ysrahel lude ropende, sodat die Philisteen dat hoerden ende seiden: "Wat is onder den Hebreeuschen dat si al ons lude ropen?" Ende ten lesten doe bekenden si dat die arcke

[fol. 111rb]

Gods onder hem gecomen was. Doe waren die Philisteen vervaert ende seiden: "Haer God is onder hem gecomen. Wee ons! Wie sel ons bewaren? Aldus frolic en waren si gisteren noch eergisteren niet. Mer laet ons sterc van moede wesen ende manlic striden op die Hebreeuschen."

Doe ghingen si jegen malcander striden. Die Philisteen verslogen die van Ysrahel 30.000 mannen ende si vingen die arke Gods. Ende Helijs twee kinderen worden daer beide verslegen.

Doe liep daer een jongelinc van Benyamin uut den strijt ende quam in Sylo. Hi scoerde sijn cleder ende leide assche op sijn hoeft ende hi quam voir Helij, die sat op enen berch ende verwachtede enen andwoerde uut den heer. Ende sijn hert was in anxt om die arck Gods. Ende doe dat gemeen volc dat verlies hoerden, doe worden si seer ropende ende screyende. Doe vraechde Helij wat dat geruft was, want hi was 98 jaer out ende hi was blint. Doe seide die man tot hem die uut den here quam, dat daer voel volcs verslegen was ende dat sijn 2 kinderen doot waren ende dat die arcke Gods gevangen was. Doe Helij hoerde dat die arcke Gods gevan\gen

[fol. 111va]

was, doe viel hi ruggelinc neder ende beswijmde. Ende in dien val bleef hi doot. Ende doe hadde hi Ysrahel geregiert 40 jaer lanc.

Ende Helijs snaer, Finees wijf, die ghinc swaer mit kinde. Doe si hoerde dat die arke Gods gevangen was ende dat haer sweer ende haer man doot was, doe creech si van rouwen een kint ende noemde dat Jacobet; dat beduut `rou ende droefheit'.