Noordnederlandse Historiebijbel
(1998)–Anoniem Noordnederlandse Historiebijbel–
Auteursrechtelijk beschermd
[Folio 103va]
| |
vergadert in Masfa. Doe vraechde die priester die man van dat wijf die daer doot was, wat van den wive ghesciet was. Doe andwoerde die man voer hem allen ende seide: "Ic quam in Gabaa onder die van Benyamin mit minen wive ende ic woude thuuswaert reysen. Doe ic een herberghe hadde, doe quamen die mannen van der steden des nachts om dat huys daer ic in was. Ende si wouden mi verslaen ende mijn wijf uut wreetheit onnatuerliken besigen ende misbruken ende hebbense gequelt ende is doot gebleven. Ende ic voerdese doot tot minen huse ende ic sneetse an 12 sticken ende sende elc geslacht een stic, want alsulke ongeoerlofde sonde ende sulken doot en is in Ysrahel nie geschiet. Nu sijn hier meest vergadert alle die machtichste van Ysrahel. Nu siet wat gi hiertoe doen wilt." Doe andwoerden alle die kinder van Ysrahel uut enen monde ende seiden: "Nyement van ons allen en sel in sijn huys comen, eer wi dat op Gabaa gewroken hebben." Doe coren sy eendrachtelic 10 mannen uut den volc. Ende die 10 mannen coren uut elc 1.000 mannen een 100. Die souden dat heer spisen berechten. Ende si souden trecken vechten op Gabaa | |
[Folio 103vb]
| |
ende op die van Benyamin ende wreken op hem die grote, lelike sonde. Doe seinden si die boden an dat geslacht van Benyamin in Gabaa, waerom dat si die grote lelike sonde gedaen hadden ende dat onder hem lieten gescien. Voert seiden die boden: "Geeft den kinder van Ysrahel uut Gabaa die die sonden gedaen hebben, opdat mense mach doden ende halen die quaetheit van Ysrahel." Mer die van Benyamin en wouden dat niet doen. Mer uut anderen groten steden van Benyamins geslacht die quamen hem te hulpe in Gabaa jegen die van Ysrahel, soedat daer wel waren 25.000 vechters van Benyamin, behalven die in Gabaa waren, want daer waren 700 stercker mannen die also wel vochten mitter lufterhant als mitter rechterhant. Ende si worpen en slingerden also wel mit die een hant als mit die ander hant. Ende der mannen van Ysrahel waren 400.000 mannen die bereit waren te striden. Doe togen die van Ysrahel in Sylo, daer die arck was, ende vraechden raets mit God wie haer prince soude wesen van haren volc jegen die van Benyamin. Hem wort geandwoert: Judas soude haer leidsman wesen. Des morgens waren die van Ysrahel vroech op ende togen voir Gabaa ende belagen die stede. Ende die van Gabaa quamen uut ende vochten jegen die van Ysrahel. | |
[Folio 104ra]
| |
Ende si slogen die van Ysrahel of 22.000 mannen. Doe vergaderden die kinder van Ysrahel voer Gode ende screyden ende vraechden raets: of si yegen die van Benyamin striden souden of niet. Hem wort geandwoert: "Gaet ende strijt daerjegens." Des anderen dages togen si weder voer Gabaa. Ende die van Benyamin quamen uut ende slogen die van Ysrahel of 18.000 mannen. Doe togen die van Ysrahel in die tabarnakel ende screyden voer God ende vasten dien dach ten avont toe. Ende si deden God sacrifici ende offerhande. Ende die biscop vraechde God of die van Ysrahel weder souden striden jegen die van Benyamin dan of sijt laten wouden. Doe seide God: "Gaet weder te stride. Morgen sel Icse u leveren in uwen handen." Doe togen die van Ysrahel weder voir Gabaa. Ende si leiden die van Benyamin lagen. Ende die van Gabaa liepen haestelic uut der steden. Ende die van Ysrahel weken verre van der steden ende die van Benyamin volchden. Doe brac die laech op die an die stede lach, ende onderliepen die stede ende staken die stede an ende barndense. Ende doe die van Ysrahel den roec op sagen gaen, doe brac die ander laech op ende vervolchden die van Benyamin. Ende doe keerden hem die ander omme die weken. Ende si bestreden die van Benyamin van voren ende van afteren. Ende daer | |
[Folio 104rb]
| |
worter binnen dien dage verslegen van Benyamins geslacht 30.000 stercke vechters ende 100. Ende die ander vlogen ter stede waert. Ende doe si opsagen, doe sagen si die stede staen barnen. Doe weken si in der woestinen. Ende die van Ysrahel volchden hem ende die 10.000 die in die lage gelegen hadden ende die stede gewonnen ende verbarnt hadden, die quamen die van Benyamin jegen, ende daer worden verslegen 18.000 mannen. Doe togen si voert al dat lant van Benyamin omme ende quamen voer een stede, hiet Remmon. Daer verslogen si 5.000 mannen. Ende ter ander stede daer verslogen si 2.000 mannen. Ende van Benyamins geslacht en bleven mer 600 mannen levende; die waren gescolen in der woestinen in speluncken. Ende die bleven daerin 4 maenden lanc. Ende die van Ysrahel togen alle die steden van Benyamin omme ende verslogent al dat daerin was, menschen ende beesten. Ende al die steden verbarnden si. |
|