Noordnederlandse Historiebijbel

16 capittel

Daerna ghinc Sampson in Gazam ende sach daer

[fol. 100vb]

een gemeenwijf ende ghinc daertoe. Ende dat vernamen die Philisteen ende besetteden die poort van der stede ende leiden daer des nachts wachters in ende meenden des morgens Sampson te verslaen. Des middernachts doe stont Sampson op ende nam die doer van der poort mit beide die posten ende ghinc daermede op enen hogen berch ende ontginc also sijn vianden.

Daerna doe creech hi een wijf lief, hiet Dalida, ende woende daermede in Sorech. Doe quamen tot haer die princen van den Philisteen ende seiden tot haer: "Ondervint van Sampson waerin dat sijn craft leit ende hoe dat wi hem mogen verwinnen. Ende leverten ons gebonden. Wi sellen u geven 1.000 sulveren penningen." Doe sprac Dalida mit Sampson ende seide: "Ic bid u, segt mi: waerin leit uwe stercheit, sodat men u niet binden en mach?" Doe seide Sampson: "Waer ic mit seven pesericken gebonden die niet droech en waren, so soude ic cranc wesen gelijc ander menschen." Doe seide Dalida dat den Philisteen. Ende doe vergaderden si seven pesericken ende gavense Dalida. Doe Sampsom sliep, doe bant hem Dalida mit die pesericken. Ende si ghinc tot den Philisteen ende seidet hem. Doe quamen die Philisteen ende wouden Sampson vangen. Ende Sampson stont op ende

[fol. 101ra]

die banden sprongen van hem ende braken, recht of men enen draet verbarnt hadde. Doe seide Dalida tot Sampson: "Gi hebt mi bedrogen ende logen angebrocht. Segt mi waermede dat men u binden mach, of gi en selt bi mi niet slapen." Doe seide Sampson: "Waer ic gebonden mit nyeuwen banden die nye gebesicht en waren, so soude ic cranc wesen als ander menschen." Ende doe bant hem Dalida des nachts mit nyeuwen banden. Ende si riep die Filisteen die daer in een camer waren. Doe si bi Sampson quamen, doe spranc Sampson op ende die banden braken als een vlasschen draet. Ende die Philisteen liepen wech. Doe seide Dalida: "Waerom brenc gi mi dus logen an. Segt mi waermede dat men u binden mach, of ic wil van u sceiden." Doe seide Sampson: "Naem gi seven locken haers van minen hoefde ende knocht die in een cam ende nagelde die cam mit enen nagel jegen die aerde, so soude ic cranc wesen." Doe dede si Sampson slapen op die aerde ende bant hem sijn haer in een cam ende nagelde die cam jegen die aerde. Ende doe seide sijt den Philisteen. Ende si quamen in den huys. Sampson stont op van den slaep ende toech den nagel uut der aerden ende scudde sijn hoeft ende verjaechde die Philisteen.

Doe seide Dalida: "Hoe macht wesen dat gi mi mint ende liefhebt? Ende gi en hebt genen sin tot mi, want gi hebt

[fol. 101rb]

mi driewerven gelogen. Ende gi en wilt mi niet seggen waerin dat uwe craft leit." Ende Dalida bat hem ende smeecte hem lange tijt daerna, sodat hi haer ten lesten die waerheit openbaerde ende seide tot haer: "Doe ic van mijnre moeder geboren wort, doe wort ic van Gode geheilicht. Ende daer en quam nye yser op mijn hoeft om mijn haer of te sceren. Waer mijn haer ofgescoren, so waer ic al mijn craft quijt ende ic waer gelijc ander menschen." Doe Dalida vernam dat hi die waerheit seide, doe ginc si tot die Philisteen ende seide: "Coemt noch eens, want nu hevet mi Sampson die waerheit geseit." Doe ghingen die Philisteen mit haer ende si namen dat gelt dat si haer geloeft hadden, mit hem. Ende Dalida dede Sampsom in haer scoet slapen. Ende si ontboet enen barbier; die scoer hem sijn haer of. Ende doe leide si hem van haren scoet ende ghinc tot die Philisteen ende seide hem dat si souden comen. Doe quamen die Philisteen in haer huys. Doe ontspranc Sampson uut sinen slaep ende seide: "Ic sel u wel verjagen van heen, als ic tevoren gedaen hebbe." Mer hi en wist niet dat die craft Gods van hem gegaen was. Doe vingen hem die Philisteen ende staken hem sijn ogen

[fol. 101va]

uut ende brochten hem gevangen in die stat van Gasa. Ende si sloten hem in een kercker.

Ende daerna begonde Sampson sijn haer weder te wassen. Ende die princen van die Philisteen die hielden hoechtijt van haren afgod Dagon in haren tempel. Ende si seiden: "Laet ons onse god sacrificie doen, want hi hevet ons onse viant gegeven in onsen handen." Si waren daer in den huse verblijt ende worscapten daer. Ende si verbliden hem. Ende doe deden si Sampson uut den kercker halen, omdat si mit hem spotten wouden. Doe men Sampson uut den kercker brocht, doe set men midden in den huse.

Doe seide Sampson tot dat kint dat hem lede: "Leet mi an die calumpne van den huse, opdat ic mi daeran wat rusten mach." Ende dat huys was vol mannen ende vrouwen. Ende alle die princen van den Philisteen die waren daerin. Ende beneden in dat huys ende boven op dat verwolft daer waren bi 3.000 menschen. Ende so wie verbi Sampson ghinc, die spottede daermede. Doe bat Sampson an God ende seide: "Och, Here God, gedeinct mijns ende verleent mi nu mijn stercheit, opdat ic mi nu mach wreken over mijn vianden, opdat ic voer dat licht mijn ogen wraec mach ontfaen ende sterven

[fol. 101vb]

mede mit den Filisteen." Ende doe haelde Sampson beide die calumpmen neder daer dat huys op stont. Ende alle die daerin waren, die bleven doot. Ende oec bleef hi selve doot.

Doe quamen sijn bruederen van sijn geslacht ende namen sijn lichaem ende gruevent in Astahol in sijns vaders graf.

Ende Sampson regierde 20 jaer Ysrahel ende was altoes haer voervechter.