Noordnederlandse Historiebijbel

12 capittel

Doe waren die van Effraym vertorent op Jepte, omdat hise niet te stride en ontboet jegen die van Amon. Ende si vergaderden voel volcx ende wouden Yepten hof verbarnen. Doe seide Yepte: "Ic was daertoe gebeden te striden jegen die Ammoniten. Ic ontboet u ende gi en wout niet comen. Ende doe ic dat sach, doe getroeste ic mijn leven in minen handen. Ende ic quam jegen die van Amon

[fol. 98va]

te stride ende God gafse mi yn minen handen. Waerom wil gi daerom jegen mi striden?"

Doe riep Yepte tot hem die van Galaad ende vacht jegen die van Effraym. Ende Yepte versloecher mit den sinen 42.000.

Ende Yepte regierde Ysrahel 6 jaer lanc. Ende doe bleef hi doot ende wort begraven in sijn stede in Galaad.

Daerna was een rechter in Ysrahel, Abesan, ende was van Bethleem ende hadde 30 sonen ende 30 dochteren. Ende hi regierde Ysrahel 7 jaer. Ende doe hi doot was, doe wort hi begraven in Bethleem.

Doe was Ahyolon rechter ende regierde Ysrahel 10 jaer. Ende daerna doe starf Ahyolon ende wort begraven in Sabulon.

Daerna was een rechter, hiet Abdon, ende hadde 40 sonen. Ende hi regierde die kinder van Ysrahel 8 jaer lanc. Doe hi starf, doe wort hi begraven in Effraym, in den berch Amalach.