Noordnederlandse Historiebijbel

13 capittel

Doe seide God tot Josue: "Gi wort out ende dat lant en is noch niet ghedeelt, noch al u vianden en sijn daeruut verjaecht, als uut Galileen ende Philisteen ende oec voel ander landen. Ic selse verjagen ende verslaen voir dat aensicht der kinder van Ysrahel. Daerom, deelt dit lant in negen delen ende in een half, want dordalf geslacht heeft Moyses geguet over die Yordaen. Ende Levijs geslacht dat en sel gi geen deel geven

[fol. 87va]

van den lande, mer die sacrificie ende die offerhande Gods van Ysrahel dat sel haer deel wesen."

Doe deelde ende ordineerde Josue ende Eleazer, die biscop, dat lant over die Jordaen. Ende Rubens geslacht hadde Zeons lant ende steden. Ende Gads geslacht hadde Ogs lant ende sijn steden. Ende half dat geslacht van Manasses die hadden dat lant van Madian. Mer Levijs geslacht en hadden daer geen deel, mer God van Ysrahel was haer besittinge ende haer deel.