Noordnederlandse Historiebijbel

29 capittel

Moyses riep doe tegader al dat volc van Ysrahel ende seide tot hem: "Gi hebt gesien wat wonder dat God voer uwen volc gedaen heeft in Egipten, ende oec dat wonder dat Hy hier gedaen heeft in der woestinen, want Hi heeft u hier 40 jaer ghevoet in der woestinen, dat u cleder niet gearcht en

[fol. 78vb]

sijn noch oec u scuenen van uwen voeten. Gi en hebt daer geen broet gegeten, noch wijn, noch gemaecten dranc gedronken. Ende daerin moechdi weten dat u God almachtich is. Ende gi sijt tot deser steden gecomen. Ende gi hebt verslegen Zeons, des conincs van Ezebon, ende Og, den coninc van Basan. Wi besitten haer lant. Daerom bewaert die woerden Gods ende hout sijn geboden, opdat die maledictien niet op u en comen die voerseit sijn, ende voert niet en gesciet als dat capittel uutwijst."