Noordnederlandse Historiebijbel

25 capittel

"Waert datter een saec waer tusschen twee mannen ende of si quamen voer recht ende baden dat te rechten, die rechters sellen dat doersien naersteliken ende geven daer openbaer recht of. Ende die onrecht heeft, die sel men oerdelen na sijn boesheit.

[fol. 76vb]

Ende na die sonden sel men hem pinigen na dier manier ende maet van die 40 slagen, opdat die onreynicheit niet becleet en wort voir uwen brueder.

Est dat daer bruederen mit malcander wonen ende heeft die een een wijf ende sterft hi sonder kint, so sel sijn brueder dat wijf nemen ende verwrecken dat saet sijns brueders. Ende dat knechtgin dat eerst geboren wort, dat sel men na den brueder nomen. Ende wil die brueder dat wijf niet nemen als die wet uutwijst, so sel dat wijf in die poort van der stede gaen ende bidden die overste van der steden dat si daer bi haer comen. Ende dan sel si tot hem seggen: Mijn mans brueder en wil mi niet nemen als die wet uutwijst, ende verwrecken dat saet sijns brueders in Ysrahel. Ende vragen die mannen hem of hi dat wijf hebben wil ende seit hi dat hi dat wijf niet en wil, so sel dat wijf tot hem treden voir die outste des volcs ende trecken sijn scoen van sinen voeten ende spuwen hem in sijn aensicht ende seggen: Aldus sel die mensche gescien die dat huus sijns brueders niet en tymmert. Ende sinen naem sel hieten in Ysrahel dat Huys des ongescoeyden.

Gi en selt in uwen huse niet hebben geen ongelike mate, groet ende cleyn, ende ongelike wichten,

[fol. 77ra]

mer gi selt hebben gerechte maten ende wichten, opdat gi lange moget leven op der aerden.

Ghedenct wat u Amelech dede, doe gi uut Egipten quaemt: hoe hi u volc versloech doe gi armoede ende verdriet hadt. Ende hi en ontsach God niet. Daerom, als gi mit rusten sit in dat Lant der Beloften, so doet Amelechs naem van der aerden ende slaet al dat volc doot." Ende dat gesciede onder coninc Saul.