Noordnederlandse Historiebijbel

23 capittel

"Een man en sel sijns vaders wijf niet nemen noch haer bedructheit niet openbaren. Een man die gelubbet is, of die sijn manlicheit ofgesneden is, die en sel in den tempel Gods niet dienen. Een man die van enen gemeenwijf geboren is, die en sel in den tempel Gods niet dienen, noch nyement die van hem comt tot den tienden grade toe. Die Amonyten ende die Moabiten die en sellen in den tempel oec niet dienen tot den tiende grade toe, want doe gi uut Egipten quaemt, doe en wouden si u broet noch water vercopen. Ende si brochten Balam jegen u, omdat hi u vermaledien soude. Mer u God en woude hem niet horen, omdat Hi u minde. Daerom en maect mit dien luden genen vrede. Ende en misdoet die van Ydumea niet, want si sijn van Ezau gecomen, Jacobs brueder. Ende en misdoet die van Egipten niet, want gi woende mit hem als incomelinghen. Ende die dorde die van hem gecomen is, die mach in den tempel Gods gaen.

Ende waer een mensche onder u die in der nacht in sinen droem besmit wort, die sel uut sijn huus gaen ende dwaen hem mit water ende comen niet weder int huus dan des avonts na der sonnen toeganc.

Ende gi en selt geen gemeenwijf laten wesen van den kinderen van Ysrahel

[fol. 76rb]

noch geen poeytieren. Gi en selt dat loen van den gemeenwiven noch dat loen van den honden in den tempel Gods niet offeren. Ende gi en selt uwen evenmensche geen gelt lenen op woker, noch oec coren, noch geenrehande ding, mer leent uwen evenbrueder dat hem noet is sonder woker, so selt u voerspoedelic gaen tot alre tijt.

Als gi Gode wat loeft, betaelt ende en toeft daer niet mede, want toeft gi daermede, het wort voer sonde gerekent. Ende wat gi eens geseit hebt, dat sel gi houden ende doen, als gi God geloeft hebt mit uwen eygen wille ende mit uwen mont gesproken hebt.

Est dat gi doer uwen evenmenschen wijngaert gaet, eet also voel druven als u lust, mer en dreecht geen wech. Gae gi doer uwes vrients coorn, breect die aren ende wrijftse in u hant, mer maeyt daer niet of."