3 capittel
"Ende daerna togen wi int conincrijc van Basan. Ende Og, die coninc, quam jegens ons te stride. Ende mit der hulpen Gods verslogen wi hem ende al sijn volc ende hadden al sijn guet. Ende doe quamen wi te Rabath. Daer wort ons des conincs bedde getoent, want hi was van den gygantengeslacht. Ende dat bedde was 9 cubitus lanc ende 4 cubitus wijt."
Doe seide Moyses tot den kinder van Ysrahel: "Gi hebt gesien hoe wonderlic dat God u dese twee coningen in uwen handen gegeven heeft. Also sel Hi al uwe vianden in uwen handen geven ende sel voer u vechten." Doe seide Moyses: "Mijn Here, mijn God, Gi hebt mi getoent uwe grote mogentheit ende die stercheit uwer handen. Daer en is geen ander God in den hemel noch in der aerden dan Gi sijt. Daerom, laet my doch gaen ende besien dat alrebeste lant over die Jordaen ende den groten berch van Lybaen. Doe was God toornich op mi om uwen willen ende en hoerde mi niet, mer seide tot mi: Spreect van dien reden niet meer tot My, mer gaet op dat hoechste van dien berch ende siet westwaert, noertwaert, suutwaert, oestwaert. Mer gi en selt over die Jordaen niet gaen.
Auteursrechtelijk beschermd