Noordnederlandse Historiebijbel

33 capittel

Die kinder van Ysrahel die togen uut Egipten onder Moyses ende Aaron in die eerste maent op den 15den dach, als men noch Paeschen hout. Ende doe sloech God al die eerstgeboren doot die in Egipten waren, menschen ende beesten. Ende omdat die van Egipten haer doden begrueven, so togen die kinder van Ysrahel op dat Rode Meer. Ende doe volchde hem Pharo mit al sijn volc. Ende die kinderen van Ysrahel die ghingen droechsvoets over dat Rode Meer ende Pharo mit al sijn volc die verdroncken daerin. "Vandaen quamen wi an den berch Synay.

[fol. 68ra]

Daerna togen wi omme doer die woestijn ende quamen in Cades ende senden daer 12 mannen om dat lant te verspien ende besagen dat 40 dagen. Die 10 mannen van den 12 en wouden in dat lant niet wesen. Daerom mosten wi 40 jaer dwalen in der woestinen ende togen op ende neder ende quamen weder op dat Rode Meer ende togen wederomme in Cades," daer si geweest hadden. Ende dat was int viertichste jaer, nadat si uut Egipten togen.

Doe ghinc Aaron opten berch Hor, als hem God geboet, op den eersten dach van die vijfte maent. Ende daer starf Aaron op den berch Hor doe hi out was 100 ende 23 jaer.

Doe die kinder van Ysrahel weder an dat Lant van Beloften gecomen waren,doe seide God tot Moyses: "Gebiet den kinderen van Ysrahel: Als si over die Jordaen comen int lant van Canaan, dat si al dat volc dootslaen ende verstroeyen ende dat si haer afgoden ende haer beelden breken. Ende deeltet mit rusten onder malcander, als dat lot valt. Ende ist dat gi die inwoenres des lants niet doot en slaet, mer laetse onder u bliven, si sellen wesen slotelen uwer ogen ende swaerden in uwen ziden. Ende si sellen u verkeren."