Noordnederlandse Historiebijbel

17 capittel

Doe sprac God tot Moyses ende seide: "Ghebiet Eleazarus, den priester, Aarons soen, dat hi gaet ende neem al die wyeroecvaten die daer leggen by die doden, verstroeyt ghins ende weder, want si sijn geheilicht." Eleasarus ghinc ende nam alle die wyeroecvaten ende droechse in die tabarnakel, opdatse nyement die ongewijt was, an en tastede, opdat hi niet en storve, als Chore mit den sinen gestorven was.

Des anderen dages doe murmureerden dat gemeen volc op Moyses ende op Aaron ende seiden: "Gi hebt dat volc Gods verslegen." Ende si worden al\le

[fol. 62ra]

in roer jegen hem beiden. Moyses ende Aaron die weeken in die tabarnakel Gods. Ende doe openbaerde die claerheit Gods op die tabarnakel. Ende God seide tot Moyses: "Gaet uut die scaren des volcs: Ic selse van der aerden doen." Doe bleef daer voel volcs doot. Doe seide Moyses tot Aaron: "Neemt een wyeroecvat ende vuer van den outaer ende gaet onder dat volc ende bidt daervoer." Doe ghinc Aaron haestelic mit een wyeroecvat, staende tusschen die levende ende die dode. Ende hi bat Gode voir dat volc ende die plaghe verginc. Ende doe waren daer doot ghebleven 14.000 mannen ende 70, behalven die mit Chore storven. Doe ghinc Aaron ende Moyses in die tabarnakel ende rusteden daer een tijt.

Doe seide God tot Moyses: "Gaet totten kinderen van Ysrahel. Ende neemt uut elc geslacht een prince ende laetse tot u comen, elc mit enen roede. Ende scrijft elc sinen naem an die roede. Ende laet Aaron oec enen roede nemen. Ende lect alle die roeden in die tabarnakel in Sancta sanctorum. Ende wie Ic tot enen biscop kyese, die sel sijn roede bloeyen. Ende Ic sel daermede die claech doen van die kinder van Ysrahel. Moyses dede also ende vergaderde daer 12 roeden ende oec Aarons roede ende screef elc sinen naem an die roeden ende leidse voir

[fol. 62rb]

die arke. Ende des anderen dages doe quamen si alle weder voir die tabarnakel. Doe vant men Aarons roede gegroeyt, ende vruchten daeran van amandel. Doe toechde Moyses alle die roeden voer die kinder van Ysrahel. Ende elc die nam sijn roede. Ende doe bleef Aaron biscop.

Doe seide God tot Moyses: "Lect Aarons roede in die arcke, opdat si daerin bewaert mach wesen tot enen teyken der wederkivinge der kinder van Ysrahel." Doe dede Moyses als God geboet ende leide die roede in die arke.