Noordnederlandse Historiebijbel

9 capittel

God seide tot Moyses in der woestinen int ander jaer nadat si uut Egipten ginghen, in die eerste maent: "Segt den kinderen van Ysrahel, dat si Paesschen houden op den 14den dach van deser maent des avonts in alle manieren als Ic hem geboden hebbe." Moyses geboet dat hem. Ende si hielden Paeschen. Ende si offerden Gode ende aten dat paeschlam.

Ende siet, daer waren die somme kinder van Ysrahel, die waren onreyn ende en mochten die Paeschen niet houden. Si ghingen tot Moyses ende tot Aaron ende seiden: "Wi en mogen Gode geen sacrificie doen mit die kinder van Ysrahel, want wi sijn onreyn." Doe seide Moyses: "Blijft hier staen; ic sel Gode raets vragen van u." God seide tot Moyses: "Sect den kinderen van Ysrahel: Een mensche die onreyn is, die sel verre van den gemenen volc wesen ende sel Paesschen houden in die ander maent. Op den 14den dach des avonts dan sel hi dat paeschlam eten, als voirseit is, ende geen been breken noch niet overhouden mer des avonts verbarnen, ende alle die manier houden, als dat geordiniert is. Ende so wie dat reyn is ende onder hem niet en waer ende Paeschen niet en hielde, die soude verscheiden wesen van sinen volc, omdat hi die

[fol. 58rb]

sacrificie niet en hielde. Ende pelgrimen ende vreemde luden die onder u sijn, die sellen Paeschen houden geliken u."

Ende doe die tabarnakel gerecht was, doe bedecktese des daechs een wolken ende des nachts een vuer. Ende als God woude dat si reysden, so verhief haer die wolken ende dan bereiden hem die kinder van Ysrahel mede te reysen.