Noordnederlandse Historiebijbel

40 capittel

Doe sprac God tot Moyses ende seide: "Opten eersten dach van der eerster maent so sel gi oprechten die tabarnakel ende ordinieren alle dingen daerin, als Ic u geseit hebbe." Moyses die dede, als hem God bevolen hadde. In dat ander jaer van dat si uut Egipten ghinghen, opten eersten dach van der eerster maent, doe vergaderde Moyses die tabarnakel ende rechtse op mit al die calumpnen ende decketse. Doe sette hi daerin die arke mit al haer cyerheit. An die suutsyde sette hi dat oratorium. Ende an die noertside sette hi die tafel mit die 12 broden ende die ander cyerheit. Doe sette hi die kandelaren, die lantaerne ende die ander vaten, als hem God bevolen hadde. Doe hinc hi dat seyl of die gordijn voir Sancta sanctorum. Doe sette hi daerbuten dat outaer van coper, daer men sacrificie

[fol. 51ra]

op dede. Doe sette hi daer die watervaten mit water, daer hem Aaron ende sijn kinderen in dwogen, als si sacrifici souden doen.

Doe rechte Moyses die tent of die rincmuer, als hem God bevolen hadde. Doet al volmaect ende gerecht was, doe decte God die tabarnakel, dat daer nyement ingaen en mocht. Ende als dat swerc hem verhief van die tabarnakel ende voirghinc, soe volchden die kinder van Ysrahel na mit die tabarnakel ende mit al haer gueden. Ende waer dat swerc bleef staen, daer rechten si die tabarnakel weder mit al haer cyerheit. Ende dan bedectese dat swerc weder des daechs mit wolken ende des nachts mit vuer. Ende daerin mocht men merken dat God in die tabarnakel was. Doe dat die kinder van Ysrahel sagen, doe rechten si haer tabarnaculen ende haer woningen daeromtrent ende hielden daer stede. Ende Moyses die anbat God ende seide: "Here, maect u volc gesont."

Explicit Exodus.

Hoc opus exegi, Cristo sit gloria Regi.

Et sic est finis, sit laus et gloria Trinis.

Qui legit, emendat; scriptorem non reprehendat.

Scriptor scripsisset bene melius, si potuisset.

[fol. 51rb]

Qui scripsit scripta, sua dextera sit benedicta.