Noordnederlandse Historiebijbel

4 capittel

Doe seide Moyses: "Si en sellen my niet geloven, noch mijn stemme niet willen horen. Mer si sellen seggen: God en heeft u niet geopenbaert." Doe seide God: "Wat heb gi in u hant?" Doe seide Moyses: "Een roede." Doe seide God: "Worptse op der aerden." Doe warp Moyses die roede op der aerden ende si verwandelde in een slange. Doe liep Moyses daerof. Doe seide God: "Moyses, neemt die staert van die slange in u hant." Moyses nam den staert in die hant ende doe wast weder een roede. Doe seide God: "Steect u hant in uwen bosem." Moyses dede dat. Doe was sijn hant al vol lazarien. Doe seide God: "Haelt u hant weder uut." Moyses dede also. Doe was sijn hant scoen, suver vleis. Doe seide God: "Est dat si u niet en horen noch en geloven, so doet hem dat eerste teyken ende daerna dat ander teyken. Gheloven si u woerden om die twee teykenen niet, so neemt water uter vloet ende stort dat op die droge aerde. Hoevoel dat gi daerop stort, het sel verwandelen in bloet."

[fol. 36va]

Doe seide Moyses: "Here, ic bid U: Verdraechtet my, want ic en ben niet wel gespraect." Doe seide God: "Wye heeft die mont des menschen gemaect, of wie heeft stom of doef gemaect, anders dan Icselve? Daerom, gaet! Ic sel in uwen mont wesen ende Ic sel u leren wat gy spreken selt." Doe seide Moyses: "Here, ic bid U: Sent daer, die Gi daer seinden selt." Doe was God toornich op Moyses ende seide: "Aaron, u brueder, die is wel gespraket. Siet, die sel u gemoeten. Toecht hem een blide herte ende spreect tot hem die woerden die Ic u geseit hebbe. Ic sel in uwen mont wesen ende oec in sinen mont. Ende Ic sel u openbaren wat gi doen selt. Aaron sel voir u spreken tot den volc. Neemt die roede in u hant, daer die teykenen in gescieden."

Doe ghinc Moyses tot Yetro, sinen sweer, ende seide: "Ic wil wederkeren tot minen broederen in Egipten ende besien of si noch leven." Doe seide Yetro: "Gaet in vreden." Doe seide God tot Moyses in Madyan: "Gaet ende keer weder in Egipten. Sy sijn doot, die u begeren te doden." Doe nam Moyses sijn wijf ende sijn kinderen ende

[fol. 36vb]

setse op ezelen ende reet daermede in Egipten ende nam die roede Gods in sijn hant. Doe Moyses in eenre cameren was ende soude eten mit sinen wijf ende mit sinen kinderen, doe quam die engel ende woudse verslaen, omdat die kinderen niet besneden en waren. Mer Sephora nam dat mes ende was van eenre scarpe leye ende besneet haer kinderen. Doe lietse die engel reysen.

Doe seide die Here tot Aaron: "Gaet jegen Moyses in der woestinen." Aaron die ghinc sinen broeder jegen. Ende doe hi bi hem quam, doe nam hi hem in den arm ende custe hem. Ende doe vertelde Moyses Aaron al die woerden, die God hem toe gesproken hadde ende al dat Hi hem geboden hadde. Doe ghingen si tesamen ende vergaerden alle die outste van Ysrahel. Ende Aaron die sprac hem allen die woerden toe, die God Moyses geseit hadde. Ende hi dede die teykenen voer dat volc ende si geloefden hem. Doe si hoerden dat God Ysrahel visiteerde ende dat Hi haer verdriet ansach, doe vielen si ter aerden ende aenbeden Hem.