Noordnederlandse Historiebijbel

50 capittel

Doe Joseph sach dat sijn vader doot was, doe viel hi op sijn aensicht ende custe hem ende screyde seer. Doe geboet Joseph sijn knechten dat si meesteren van medicinen halen souden mit cruden ende mit salven om sijn vader te balsamen. Die knechten deden also. Doe quamen die meesteren ende balsemden dat lichaem van Jacob, alst in Egipten een zede was. Ende aldaer wort Jacob bescreyt 70 dagen lanc. Ende doe ghinc Joseph tot coninc Pharo ende seide dat hi sijn vader gesworen hadde, als hi doot waer, dat hi hem dan begraven soude int lant van Canaan. Ende hi bat of hi hem oerlof geven woude. Doe seide coninc Pharo: "Gaet ende begravet uwen vader, als ghi hem gesworen hebt." Doe nam Joseph wagenen, paerden ende ander beesten, ende voel volcs uut Egypten, want al sijn bruederen togen mit hem. Mer die kinderen bleven thuus. Oec so toghen die alre outste uut coninc Pharoen hof mede,

[fol. 32rb]

ende oec mede die eerbaerste van Egipten. Doe si dat lichaem brochten int lant van Canaan, doe voerden sijt in den acker Ebron die Abraham gekoft hadde. Ende daer lach Abraham ende Ysaac begraven. Aldaer begroeven si Jacob mede bi sinen vader. Doe toech Joseph mit al sijn gesyn weder in Egipten.

Doe Jacob doot was ende begraven, doe ontsagen die bruederen Joseph, omdat si hem misdaen hadden. Ende si duchteden dat hi dat noch gedencken soude. Ende sy spraken heymelic tesamen, dat si hem om vergiffenisse bidden wouden. Doe quamen die bruederen gemeenlic ende vielen op haer knyen voir Joseph ende seiden: "Wi sijn u knechten. Wy bidden u dat gi ons die sonden ende die quaetheit vergeven wilt, die wi in u gedaen hebben." Doe Joseph dat hoerde, doe screyde hi ende seide: "Wilt niet vervaert wesen. Gi denct, dat ic u quaet doen soude. Mer God heeftet verwandelt in doechden. Wilt niet vervaert wesen, noch my ontsien. Ic sel u ende u kinderen voeden ende vertroesten." Doe waren die bruederen verblijt.

Ende si bleven wonen in haers vaders husinghe. Joseph leefde also lange, dat hi sach Effrayms kinderkinderen totten dorden grade toe.

[fol. 32va]

Ende hi sach Manasses dochter kint. Doe sijn sterfdach naecte, doe seide hi tot sinen bruederen: "Als ic doot bin, so sel God u daerna visiteren, ende Hi sel u brengen in dat lant dat hi swoer Abraham, Ysaac ende Jacob. Daerom seg ic u: Als gi alle uut desen lande vaert, soe neemt mijn gebeent mit u ende voertet int lant van Canaan ende graeftet bi minen voirvaderen." Ende doe Joseph out was 100 ende 10 jaer, doe bleef hi doot. Ende hi wort begraven int lant van Egipten.

God si gheloeft.

Qui legit, emendat scriptorem; non reprehendat.

Scriptor scripsisset bene melius, si potuisset.

Qui scripsit scripta, sua dextera sit benedicta.

Hieran volcht dat ander boec, Exodus.