Noordnederlandse Historiebijbel

49 capittel

Daerna riep Jacob sijn kinderen ende seide: "Vergader al bi een: ic sel u boetscappen dingen die toecomende sellen wesen." Doe vergaderden si alle bi haren vader. Doe seide Jacob: "Mijn kinderen, hoert Ysrahel, uwen vader!" Doe seide hi: "Ruben, gi sijt die outste van minen kinderen. Ende dat beghin van minen rouwe sijt gi. Gi sijt uutgestort als water. Gi en selt niet wassen, want gi hebt uwes vaders

[fol. 31va]

biwijf besmet.

Symeon ende Levy, gi sijt twee brueders. Gi sijt vaten der quaetheit ende des strijts. Nye en was ic tot haren raet. Ende in uwen woerden en hadde ic nye genoecht, want in uwen toorn so sloech gi die mannen van Scychem. In uwen quaden wille so ondergroef gi die mueren. Uwen toorn is vermaledijt. Gi selt gesceiden worden in Jacob ende verstroeyt worden in Ysrahel, want van den enen so quamen die scriben ende van den anderen so quamen die phariseen.

Judas, ju bruederen sellen u loven. U hant sal wesen halslacht uwer vianden. Die kinderen uwes vaders die sellen u onderdanich wesen, gelijc den jongen leeu den ouden. Als die leeu ende die leeuwinne rusten, wie der die wrecken? Die mogentheit en sel van Judas niet genomen worden. Ende van sinen geslacht sellen coningen ende hertogen comen. Ende sijn geslacht en sel niet tenietgaen, eer Hi gesent is, die men senden sel, daer dat menschelike gheslacht na wacht. Want Maria ende Jhesus die sellen van sijn geslacht geboren worden. Als Hi gesent is, o lief kinderen, Hi sel sijn ezel binden an den wijngaert, ende oec sijn jonc. Hi sel sijn cleet in wijn dwaen, ende in dat bloet der druven sijn mantel. Sijn ogen sijn claerre dan die wijn ende sijn tanden witter dan melc.

Sabulon, u geslacht sel wonen bi den over der zee, daer

[fol. 31vb]

die scepen varen tot Sydon.

Ysachar, een sterc ezel rustende int eynde, ende sach dat die rust guet was in dat beste lant, ende scicte sijn scueren te dragen. Hi is gemaect den tribuyt te dienen. Van sijn geslacht was Judas, die verrader, geboren.

Dan sel sijn volc berechten als die ander van Ysrahel ende sel worden een slange mit twee hoornen, leggende in den wech ende biten die nagelen der paerden, opdat die opsitter afterwaert mach vallen. Eerst sel van sinen geslacht geboren worden Sampson. Ende hierna sel Antekerst van sijn geslacht geboren worden.

Gad sal cloeclic vechten voir sijn volc ende sellen afterwaert opgescort wesen.

Azers lant sel voel gueder vruchten brengen ende sal proven die weelden der coningen.

Neptalim, een knecht die uutgesent is om te geven scoen spraec.

Joseph, wassende ende scoen van aensicht. Die vrouwen clommen op der mueren om u scoenheit te sien. Mer dat quam tot wreetheit ende tot kijf. Si sagen dat hi scutten hadde. Si sellen sitten in sijn stercke bogen ende die banden van haren armen sellen ontbinden overmits die mogende hant Jacobs, uwes vaders. God sel u hulper wesen ende die almachtige God die gebenedie u mit die benedixie des hemels. Van Josephs geslacht wort Yeroboam geboren.

Benyamin, een gripende wolf, die vroech sinen

[fol. 32ra]

roef et, ende avonts deelt hi sijn roef."

Dat sijn die 12 geslachten van Ysrahel.

Doe gebenedide hi elc geslacht bisonder ende seide: "Ic ben onder mijn volc vergadert. Gi selt my begraven int lant van Canaan, in die dubbelde spelunc in den acker Ebron bi minen vaderen." Doe Jacob sijn kinderen gebenedijt hadde ende gepropheteert hadde hoet mit hem vergaen soude, doe streckede hi sijn voeten bi een uut ende bleef doot.