Noordnederlandse Historiebijbel
(1998)–Anoniem Noordnederlandse Historiebijbel–
Auteursrechtelijk beschermd
[Folio 30rb]
| |
Canaan. Doe vraechde coninc Pharo: "Wat wercken connen u bruederen doen?" Doe seide Joseph: "Het sijn heerden van scapen ende van anderen beesten. Ende si sijn u knechten; omdat sy geen voer noch weyden en vinden int lant van Canaan, so sijn si hier gecomen. Ende daerom bid ic u, of gise wilt laten wonen int lant van Gessem." Doe seide die coninc: "Ju vader ende u brueders die sijn nu tot u gecomen. Siet, dat lant van Egipten staet in uwen handen. Daerom, laetse wonen in die beste stede ende geeft hem dat lant van Gessem." Doe brocht Joseph sijn vader voir den coninc. Die coninc dede hem vrientscap ende vraechde hem hoe out dat hi was. Jacob seide: "100 ende 30 jaer." Ende Jacob hadde meer woerden mitten coninc. Ende doe wijsde Joseph sijn vader ende sijn brueders te wonen int lant van Gessem. Dat was daerna Tebea, daer Mauritius woende ende here was. Ende Joseph voirsach sinen vader ende al dat hem toehoerde van hare noeturft ende van al dat si te doen hadden. Doe was in al die werelt gebrec broets. Ende overal was dat volc bedruct van honger ende oec in Egipten mede, want al dat coren dat in Egipten was, dat | |
[Folio 30va]
| |
stont in Josephs handen. Ende men mostet jegen hem copen, soedat die van Egipten coften coren jegen Joseph. Ende Joseph vergaderde al dat gelt in des conincs kist. Doe dat gemeen volc van Egypten geen gelt meer en hadden, doe quamen si tot Joseph ende seiden: "Geeft ons broet, of wi sellen van honger sterven, want wi en hebben geen gelt." Doe seide Joseph: "Heb gi geen gelt, soe brenct u beesten. Ic sel u coren daervoer geven." Doe brochten dat volc haer beesten ende Joseph gaf hem coren daervoer. Alsoe voede hise dat jaer. Dat ander jaer daerna doe quam dat gemeen volc van Egypten tot Joseph ende seiden: "Wi en hebben niet daer wi of leven mogen, gelt noch beesten. Mer neemt ons lant ende ons lijf ende laet ons u dienen ende voet ons, opdat wy niet van honger en sterven." Doe coft Joseph al dat lant van Egipten jegen dengenen die eygendom hadden, van den mintsten tot den meesten, overmits honger die si hadden. Mer dat lant dat den papen toehoerde, dat hem die coninc gegeven hadde, dat liet hem Joseph houden. Ende die statuten ende dat recht dat hem die coninc gegeven hadde van coren, dat leverde hem Joseph uut den scueren ende verminderde dat niet. Daerom en moet men der papen guet | |
[Folio 30vb]
| |
niet vercopen. Doe seide Joseph tot den gemeen volc: "Nu weet, dat u lant ende u lijf des conincs is. Daerom, neemt saet ende coren ende saeytet in den acker, opdat gi vruchten moecht winnen. Ende dat vijfte deel van die vruchten die gi wint, die sel gi den coninc geven. Ende die vier delen sel gi selve houden voir u kinderen ende voir u gesin." Doe seide dat gemeen volc: "Onse salicheit staet in uwen handen. Ende wi willen den coninc blidelic dienen." Ende van die tijt tot huden des dages toe so geven die van Egipten den coninc dat vijfte deel van haren vruchten. Mer der papen lant is vry van dien recht. Jacob woende daer in Egipten int lant van Gessem. Ende sijn gueden worden vermeret ende vermenichvoudicht. Ende hi leefde daer in Egipten 17 jaer. Ende doe hi out was 100 ende 47 jaer, doe bekende hi dattet sijn sterfdach naecte. Doe ontboet hi Joseph, sinen soen, tot hem ende seide: "Heb ic gracie in uwen aensicht gevonden, so doet my ontfermherticheit ende lect u hant op mi ende sweert my dat gi mi in Egipten niet en selt graven. Mer gi selt my balsamen ende graven mi bi mynen vader." Doe seide Joseph: "Ic sel u begeert vervollen ende volbrengen." Ende hi swoer hem dat. Doe dancte ende lovede Jacob Gode. Ende corts daerna doe viel | |
[Folio 31ra]
| |
Jacob te bedde van siecten. |
|