Noordnederlandse Historiebijbel

18 capittel

Daerna doe openbaerde Hem God Abraham, daer hi sat voir die dore van sinen tabarnakel of sijn huys. Ende doe Abraham sijn ogen opsloech, doe sach hi daer 3 jongelingen voir hem. Hi liep hem jegen ende aenbeder een ende seide: "Here, heb ic gracie voir uwen ogen vercregen, soe en gaet niet van uwen knecht. Mer ic sel wat waters halen, dat ic U voeten mach dwaen. Ende rust wat onder desen boem. Ic sel wat broets halen, opdat Gi gesterct moecht worden." Doe seiden si: "Doet dat gi geseit hebt." Abraham ghinc in sijn tabarnakel tot Sara ende seide: "Neemt 3 maten blomen van meel ende menget dat tesamen ende maect daer broet of ende bactet onder der

[fol. 11rb]

asschen." Ende Abraham ghinc tot sinen beesten ende nam dat beste, vetste calf ende gaft sinen knechten, omdat si dat bereiden souden ende kokent ten eten. Ende doe nam Abraham butter ende melc ende dat calf dat daer gecoect was ende sette dat voir die jongelinghen. Ende Abraham stont voir hem onder den boem. Doe die jongelingen aten, doe seiden si tot Abraham: "Waer is Sara, u wijf?" Doe seide hi: "Siet, si is in die tabarnakel." Doe seider een: "Laetse tot u comen, want Sara, u wijf, sel in corter tijt een kint ontfangen." Doe Sara dat hoerde, daer si after die dore stont van der tabarnakel, doe lachede si ende seide heymelic: "Wi sijn beide out. Ende sel ic nu in mijn outheit kint dragen?" Doe seide die Here tot Abraham: "Waerom lacht Sara? Meent si dat si in haer outheit geen kint dregen en mach? Is God enich dinc onmogelic? Als Ic wedercome ten naesten jaer, so sel Sara een kint hebben." Doe quam Sara ende seide: "Ic en lachede niet, mer ic was van anxt vervaert." Doe seide die Heer: "Ten is also niet, mer gi lachede."

Doe die mannen opstonden, ghingen si tot Sodome waert. Doe seide die Here tot Abraham: "Die sonden van Sodoma ende van Gomorra

[fol. 11va]

die sijn seer groet ende swaer ende ropen van der aerden tot Mi." Abraham stont voir den Here ende seide: "Here, sel Gi den rechtvaerdigen mit den onrechtvaerdigen laten vergaen? Of daer vijftich rechtvaerdige menscen waren in die stede, sel Gi die mitten onrechtvaerdigen doen vergaen? Here, dat wees verre van U, dat Gi dat doen sout, dat Gi die rechtvaerdighe mitten sondigen sout doen vergaen." Doe seide God tot Abraham: "Vint gi daer in die stede 50 guede menschen, Ic en selse niet laten vergaen." Doe seide Abraham: "Here, ic heb eens gesproken ende ic ben stof ende assche. Of men daer 45 guede menschen vonde?" God seide: "Vint gi daer 45, Ic en selse niet laten vergaen." Doe seide Abraham: "Here, of daer 40 gevonden worden, wat sout Gi doen?" God seide tot Abraham: "Noch sel Icse sparen." Doe seide Abraham: "Here, neemttet in genen onwaerde, dat ic noch wat spreec. Of daer 30 guede menschen gevonden worden?" God seide: "Vint gi daer 30, Ic en sel hem niet doen." Doe seide Abraham: "Heer, laet mi noch eens spreken. Of daer 20 gueder menschen gevonden worden?" Doe seide God: "Isser 20, Ic en selse niet verslaen." Doe seide Abraham: "Here, ic bid U: Wort niet toornich, dat ic noch eens spreke. Of daer 10 gevonden worden?" God seide: "Ic selse om die 10 sparen." Doe sceide God

[fol. 11vb]

van Abraham ende Abraham ghinc in sijn huus.