Noordnederlandse Historiebijbel

[fol. 4vb]

6 capittel

Noe die was die tiende van Adam. Doe hi out was 500 jaer, doe wan hi drie kinderen: Sem, Cam ende Jafet.

Doe die menschen begonden te menichvoudigen op der aerden ende voel kinderen te winnen, doe sagen die kinderen Gods - dat waren si die van Seth waren gecomen -, die kinderen der menschen an, dat si groet ende scoen waren. Ende die waren van Cayn gecomen, die namen si te wive.

Ende doe si also 100 jaer ende 20 an malcander gehilict waren, doe wonnen si grote roesen, die sterc ende machtich waren, ende die hem geen quaet en ontsagen. Ende alle leefden si in sonden jegen natueren, na den wille des vleis.

Doe God die quaetheit ansach die in der aerden was, doe seide Hi: "My rouwet, dat Ic den mensche gemaect hebbe. Daerom sel Ict al doen van der aerden, dat Ic gescepen hebbe: menschen, beesten ende vogelen, want het is al geneicht tot quaetheit. Mer Noe heeft graci voir Mi gevonden, want hi is een rechtvaerdich man ende volmaect in sinen wercken voir Gode."

Doe seide God tot Noe: "Die aerde is vervolt mit alre quaetheit. Ende dat eynde van allen vleis is gecomen, want om haer quaetheit sel Icse van der aerden doen. Gy selt maken een arke van lichten hout. Ende gi seltse binnen ende buten lymen ende dicht maken. Ende gi selt die arke lanc maken 300 cubitus ende 50 cubitus wijt ende 30 cubitus hoech. Ende gi selt daer een veynster

[fol. 5ra]

an maken. Ende boven sel gi die lencte ende die breete vergaderen in een cubitus. Ende an die een side sel gi een doer maken. Ende voel cameren sel gi daeryn maken. Siet, Ic sel die dyluvye des waters doen comen op der aerden ende Ic sel alle vleis doden dat opter aerden is daer een levende geest in is. Mer Ic set mijn paeys tusschen Mi ende di. Ende als die arke gemaect is, so sel gi nemen van allen dieren die opter aerden sijn, een paer van vogelen mit u in der arken, opdat si levende mogen bliven. Oec sel gi spijs nemen in der arken: voir menschen, voir vogelen, voir beesten."

Doe ghinc Noe ende maecte die arke, alsoe als God hem bevolen hadde. Die arke was beneden viercant ende boven viercant, als God ordineerde. Ende daer waren vijf cameren in: die een boven den anderen. In die onderste camer viel die misse van hem allen. Ende in die ander camer daer was haer alre spijs in. In die dorde camer waren die bytende dieren in. In die vierde camer waren softe dieren in. In die vijfte camer daer waren die menschen ende die vogelen. Ende twisschen die bitende dieren ende die softe dieren daer was een doerganc gemaect om elc haer voetsel te geven.

Noe die tymmerde hondert jaer over die arke om die natuerlike doot daerin te ontgaen. Mer onser isser nu voel die niet 100 dagen in penitencie en willen leven om die ewige doot te ontgaen.

Doe

[fol. 5rb]

Noe die arke volmaect hadde, doe dede God daerin van onsuveren dyeren een paer, een hi ende een sy, ende van suveren dyeren 7 paer. Die suver dyeren, dat waren die splitte voeten hadden ende eercauden. Ende alle die heel voeten hadden, vogelen of dieren, die waren onreyn.