Niederrheinische Liederhandschrift von 1574 (1574-1591)

Niederrheinische Liederhandschrift von 1574

(1574-1591)–Anoniem Niederrheinische Liederhandschrift von 1574– rechtenstatus

Auteursrechtvrij

Vorige Volgende



[Folio 17r]
[Noch groener farben meinn hertz verlangtt] 1. Noch groener farben meinn hertz verlangtt Dar ich alleine was Sey hat mein hertz vmbfangenn, Gleich wie das groene graeß Das spreůst daraůß der meies zeit Mit manchem bloemlein klare Vnnd noch weis ich eine Jůngkfrawe fein sey springet in dem hertze mein Jn diesem newenn Jar. 2. Grawe farb trůg sei noch doe ick sey lestmall saghe Jr wesenn das gefiell mir woll freůndtlich sey zů mir sprach Sey boedt mir irhen roeten můndt, meinns leidens ich vergaß sey thedt mir ir verlangen kůndt Mein hertz in thaůsendt frewden stůndt, dweil ich bey ihr was.
[Folio 17v]
3. Vmb irent willen tragenn ich weiß Woll inn meines hertzenn grůndt Mein hertz stelt in ganntzer lůst Noch meines Liebenn roettenn můndt Bey sey hab ich mein hertz gesanndt bey tagh vnnd aůch bey nachte, Vmb sey so gahn, ich mannichenn gangk, Der wegh wirdt mir nit zů langk wenn ich sey schawen magh. 4. Braůne farb erschreckett mich jch dar es niemandt sagenn Wiewoll das ich so groesse liebe inn meinem hertzenn traege Wie gern das ich froelich were Nhů mois ich trawrenn Aůff das kein flasche kleffer sagen, Was leidens ich inn meinem hertzen traegenn Vmb willen der liebster mein.
[Folio 18r]
5. Roete farbe hat sei ahn vonn liebten brenndt mir mein hertz das sei das nicht geleschenn kahnn Leidenn ich groessenn schmertz Jch sprech sey noch vonn hertzenn gernn, Ach můcht ir bey ir sein Jch hof sey soltt sich meiner Erbarmenn, vnnd schmůcken mich freůndtlich in ihr Armen Als ich in leidenn bin. 6. Blanc so traget die liebste mein vonn rechter stetigkeit Alles das mein hertz begertt das solt ir sein bereidt Vnnd hat gar keinen zweiffell ahnn Jn trawenn ich sey meine Jch will in ihren diensten stahnn so lang als ich das lebenn han Woll in den noetenn mein.
[Folio 18v]
7. Schwartze farbe betruebet mich Es můes gescheidenn sein, O hertzliebes angesicht Ade ich fahr dahinn Es moeß gescheidenn sein, Dů wilst nicht mit mir gahn, darůmb will ich dich fahrenn lahn So lang als ich das leben han Saltů nit vergessenn seinn.

Vorige Volgende