|
| |
| |
| |
[Hoerdt moeder liebste moeder mein]
1. Hoerdt moeder liebste moeder mein,
Sprach sich ein zartz Jůngkfrewlein Fein,
Von leidt kahn ich nicht leben,
Wann ich woll ann den Edlen Stůdenten gedenck,
Seinn schonnheit mir mein hertz erkrenckt,
2. Es sprach die mutter ach Dochterlein mein,
Derhalben soltů nit traurich seinn,
Was solt dir einn Stůdente,
Jch will dir einen Kaůffmahn geben
Darmit soltů in Frewden leben,
Die Stůdenten seindt ahnn Renten.
| |
| |
3. Recht baldt sich das selb Medtlein bedacht,
Als weder zů der Můtter sprach,
Ewer redt die brengt mir schmertzenn,
Der koůffman solt mich mit frieden laen,
Jch will vnd můes einn Stůdenten han,
das redt ich eůch von hertzen.
4. Richtůmb acht ich nicht oder gelt,
Der Stůdendt ist mir lieber als die welt,
niemandt solt mich abwenden,
Von der Edlen Stůdenten broederschaft,
die allenthalben wirdt groes geacht,
Jn allen Landen vnd Steden.
| |
| |
5. Mir gefelt der studentenn weiss gar woll,
Dan sey seindt aller ehrenn voll,
Mit zůcht seindt sey gezeiret,
Darneben sey vil Jůgendt hant
manichfalt vbertrift ir gewalt,
den raům můes man in geben.
6. Ach wan sei komen spacierenn daher,
So leůchten sey als der Morgenstern
Wem thoendt sey nicht gefallen,
Wem ist nicht lieb ihr laůten schlaen,
Wan sey darher modierenn, gahn,
mit seyden spill vnd schalle.
| |
| |
7. Nimmer bin ich gewesen holtt,
Einem Plaestertreder, oder trůnckenboltz
Welcher nicht hat gelerneth
Es solt ein freier Stůdente sein,
Dem ich vertrawe die ehre mein,
Welcher etwas hat gelehrnet.
8. Nhu ade kaůffmahn zů gůeter nacht,
Dich man hir gahr weinigh acht,
meiner darffstů nit gewarten,
Frischs aůf ihr von der fettern gůet,
nach eůch steit all mein sin vnd můet,
nach eůch ich alzeit trachte.
| |
| |
9. Uch stüdenten gebenn ich all den preiss
Jr sietenn loeb ich mit allem fleis,
Sey fůhrenn ein zartes lebenn,
Bey den Stůdenten ist es gůet sein,
Mit warheit konnen sey schertzen fein,
lieblich vnnd freůndtlich redenn.
10. Sei ist die vns dies liedtlein sangh,
Ein zartes Jůngkfrewleinn woll genant,
Sey hats gar woll gesůngenn
Sey helt die Stůdenten in groesser acht,
alle andere gesellen vnůeracht,
es ist ir woll gelůngenn.
 
|
|
Auteursrechtvrij
