Een Nieu geestelijck liedt-boecxken

inhoudende veel nieuwe Liedekens, die welcke noyt in druck en zijn gheweest

Een ander nieuw Gheestelijck Liedeken, van het nieuwe Jerusalem.

Op de wijse: Maximilianus de Bossu.

Gheluckigh en saligh zijnse Heer,
Die in u Huys mogen woonen,
V soete presentie verheught haer seer,
Reyn liefde zy u betoonen,
Sy loven u in der eeuwigheyt,
dat ghy so schoone stadt hebt bereyt
Om u Dienaers daer in te croonen.
Dese Stadt is uyt ghenomen schoon,
Sy en sal oock niet verwoesten,
Want het is uwen Heylighen troon,
wie en sou daer niet na lusten,
daer altijt geneughte is sonder verdragh
Daer duysent jaer is als eenen dagh,
wel haer die daer in rusten.
Soeckt dese Stadt doch alle gaer,
En wilt de weerelt laten,
Haer mueren zijn als Jaspis claer
Als fijn gout zijn haer straten,
Van Gesteenten en van Peerlen net,
So zijn haer poorten fraey gheset,
Sy is so schoon boven maten.
De Inwoonders van dese Stadt Gods reyn,
Sijn verciert met blinckende cleeren,
Sy hebben hier in dit Aertsche pleyn,
Ghedient den Heer der Heeren,
Haer Lampen verciert met Olye saen
Tot den Bruydegom zijn zy inghegaen,
In de vreughde die niet sal keeren.

[fol. D6v]

 

Dit is haer meeste vreught ghewis

 

Die zy hebben warachtigh,

 

Godt claer te aenschouwen ghelijck hy is

 

Ja zijn Godtlijck wesen crachtigh,

 

Van zijn claer blinckende aenschijn goet,

 

V comt alle gheneughte ende vreughde soet,

 

Dus loven wy hem eendrachtigh.

 

Sy hebben oock vreught en melodije

 

Te aenschouwen die schoone vriendinne,

 

Maria Gods Moeder en Maghet blije,

 

Die Hemelsche Coninginne,

 

Die neghen chooren der Engelen jent,

 

De schoonheyt der Hemelen excellent,

 

Dit verheught haer herten sinne.

 

Haer vreught die in onsprekelijck,

 

Die haer nu is ghegheven,

 

Om dat sy weten sekerlijck

 

Dat haer namen zijn gheschreven,

 

In het Boeck des levens reyn onbevleckt,

 

Dit maeckt haer vreughde gheheel perfeckt

 

Dat zy eeuwigh daer sullen leven.

 

Daer en is gheen droefheyt noch verdriet

 

Gheen lijden en mach haer crencken,

 

Maer wat daer is en weet men niet,

 

Gheen herte en cant bedencken,

 

De schoonheyt van dese nieuwe Stadt

 

Met al haer glorie, vreught en schat,

 

Sal Godt zijn Dienaren schencken.

 

Ghy edele Christianen fier

 

Wilt dit doch wel versinnen,

 

En wilt de Weerelt versmaden hier

 

Om dese Stadt te winnen,

 

Noyt menschen tonghe en hevet verbreyt,

 

Wat glorie onse Heer heeft bereyt,

[fol. D7r]

 

Die hem te recht beminnen.

 

Ghy Princen en Princessen fijn

 

Na dese Stadt wilt haken,

 

Laet de dinghen die daer beneden zijn,

 

En dat boven is wilt smaken,

 

Hier neerstelijck op u leven let.

 

Want so wat met zonden is besmet,

 

V sal die Stadt niet ghenaken.