Een Nieu geestelijck liedt-boecxken

inhoudende veel nieuwe Liedekens, die welcke noyt in druck en zijn gheweest

[fol. D1r]

Een nieu Liedeken,

op de wijse: In Oostenrijck daer staet een huys
het is so schoon verciert.

OCh menschen hoe meught ghy dus zijn verblijt
Dat ghy meught vrolijcheyt aenvaerden,
Ons leven is hier een corten tijt
En ghy moet haest in der aerden
Hoe rijck, hoe machtigh, hoe valiant, hoe valiant,
En ghy moet haest mee heen nae t'ander lant.
Hoe schoon dat ghy u hayr verciert
En verheft u boven maten
Hoe schoon dat ghy u hooft palliert,
Ghy moet dat al hier mede laten,
V leven moet ghy hier stellen te pant, hier stellen
En ghy moet haest mee heen nae t'ander lant.
Waer zijn zy nu menschen neemt hier op acht
Die waren over hondert jaren,
Sy legghen al in der aerden versmacht,
Ghelijck of sy die niet en waren
Sy crijghen een kist met een linnen bant, linnen,
Daer varen sy mede heen nae t'ander lant.
Wat helpt nu Salomons wijsheyt ter noot,
Mathusalem sijn langhe stonden,
Samson en Hercules van crachte groot
Die doot heeftse al verslonden,
En Absolon schoon als een diamant, als een, etc.
Sy mosten oock mede heen nae t'ander lant.
Wat helpt Alexander sijn heerschappy
Die al die weerelt was te cleene,
En Aristotelis Philosophy
Sy zijn al daer heenen,
Die doot comt ons so dapper te hant, so dapper
Sy streckt ons mede heen nae t'ander lant.

[fol. D1v]

 

Ons daghen vergaen ghelijck een roock

 

Als een schadu is al ons leven,

 

Wy gaen int eynde verdwijnen oock

 

Als een bloem des velts verheven

 

Dat eerste paer volcx dat men oyt vant, dat men, etc.

 

Sy zijn al mede heen nae t'ander lant.

 

Die weerelt met al haer lusten vergaet,

 

Niet van ydelheyt zy hanteeren,

 

Die nu sitten in den hooghsten graet

 

Morghen siet men die weder verneeren,

 

Hebben zy dan gheen goede wercken geplant, etc.

 

Wat sullen zy mayen int ander lant

 

Och menschen wilt van het quaet af staen,

 

Verfoeyt die weerelt met haer lusten,

 

Ghy siet wel hoe dat het hier toe moet gaen,

 

Want ghy moet in der aerden rusten,

 

Dus wacht u doch voor den helschen brant, etc.

 

Ghy blijft daer eeuwigh in dat ander lant.