Een Nieu geestelijck liedt-boecxken
(1618)–Anoniem Nieu geestelijck liedt-boecxken, Een–
Auteursrechtvrijinhoudende veel nieuwe Liedekens, die welcke noyt in druck en zijn gheweest
[Folio B6r]
| |
Al na die Maeghdekens eerbaer,
Die u uyt onreynigheyt sonder verstrangen
Beminnen in dit nieuwe Jaer.
Gheeft Jesus eer // o Maeghden teer
Die ons door sijn doot // seer bloot
Verlost heeft groot // uyt onsen noot,
Door zijn Heylighe bloede root.
So dat wy lesen in Canticis,
Daer ghy seer mindelijck hebt ghesproken
Al tot de Edele Maeghdekens fris,
Die haer reynheyt noyt hebben gebroken,
Ghy spreeckt daer met also groot vercloecken,
Ick ben een Lelijs des dals voorwaer,
En bloeme des Velts die altijt staet open,
Al in dit soete nieuwe Jaer.
Een bloeme jent // seer excellent
Is Jesus schoon // int Hemels troon,
Dus geeft hem prijs // o Maeghden wijs
En danckbaerheyt te loon.
Mijn bruyt is wit en suyverlijck
Spreeckt uwen Bruydegom verheven,
En van coleuren oock also rijck,
Ick mach haer nemmermeer begheven,
O Maeghden volght hem sonder sneven,
V Bruydegom die is eerbaer,
Die maeghdom is een Enghels leven,
Al in dit soete nieuwe Jaer.
Een Maeght neemt acht // op Godt zy wacht,
En denckt waer // dat zy gaet met daet
Hoe dat sy fel // mach leven wel,
Al na zijn Heylighe raet.
Comt mijn Vriendinne spreeckt Christus jent,
Tot u o Maeghdekens seer schoone
Ghy staet so vast in mijn hert gheprent
Mijn uyt-ghelesen schoone bloeme,
Hoe schoon so zijn u ganghen ydoone
| |
[Folio B6v]
| |
O Princelijcke Dochter eerbaer,
Inder schoone // sonder misdoene,
Al in dit soete nieuwe Jaer.
O Maeghden schoon // ghy spant de Croon,
By Jesus int openbaer // voorwaer,
Dat bewijst hy dan // al met Sint Jan,
Dat op zijn Borst rust daer.
Ick sal u voeren in mijnen Vaders Landt,
Daer sal ick u gheven der Maeghden Croone,
Daer sult ghy singhen eenen nieuwen sangh,
Spreeckt Christus tot u o Maeghden schoone,
Al met die Enghelen voor mijnen troone,
Een nieuwe Liedt dat is eerbaer,
Glorie zy Godt in den hooghen troone,
Al in dat soete nieuwe Jaer.
Der Maeghden schaer // die singhen voorwaer,
Glorie en eer, voor Godt den Heer,
Die Engelen schoon, staen voor sijn troon,
En dancken hem altijt meer.
Daer sult ghy blincken als Lelyen claer,
Voor uwen Bruydegom seer schoone,
Met witte cleederen int openbaer,
En singhen glorie Godt in den troone,
Met die Coninghen des Hemels croone,
Maria die reyne Maghet claer,
En met die vier-en-twintigh Ouders schoone,
Al in dit soete nieuwe Jaer.
Weest ghegroet // Coninginne goet,
Maria eerbaer // reyne Maghet claer,
Bidt voorwaer // den Hemelschen Vaer,
Voor ons een saligh Jaer.
Mijn beminde is mijn en ick ben hem,
Ghy wort ghevoet tusschen der Lelijen Scharen,
Tot dat den dagh op-rijst en hoort mijn stem,
O Maeghden wilt sijn eer altijt verclaren,
Hy is de sterckheyt der Martelaren,
| |
[Folio B7r]
| |
En oock een Prins der Maeghden claer,
Dus wilt u Bruydegom altijt bewaren,
Al in dit soete nieuwe Jaer.
Der Maeghden stam // die volghen 't Lam,
Waer henen dat het gaet // en staet,
Om dat zy net // niet zijn besmet,
Met eenighe Vrouwen quaet.
V Bruydegom die is neder ghegaen,
Ter plaetse der wel-ruyckende cruyden,
Om van u lof en prijs t'ontfaen,
O Maeghden prijst hem over luyden,
Hy vergaert de Lelykens van zijner Bruyden,
Twelck zijn deughden, dat is claer,
Dus wilt zijn lof altijt beduyden,
Al in dit soete nieuwe Jaer.
Met deught // verheught, tot Godt met lof,
So gaet met daet // niet obstinaet,
Dat ghy meught luycken // dit Bloemken pluycken
Twelck is der deughden raet:
Tot u o edele Maeghden schoon,
Wort Eclesiasticus ghesproken,
Bloeyt bloemkens als der Lelijen boom,
Spruyt bladeren uyt tot soeter roecken
Dus wilt u doch altijt vercloecken
Om hem te dienen met herten claer,
Met bidden wilt hem altijt versoecken,
Al in dit soete nieuwe Jaer.
'Tghebedt seer net // begint t'verwint,
Alle misdaet // en valsche raet,
Dus laet ons bidden, alhier int midden,
Van dese Weerelt quaet.
Noch roept u Bruydegom in Canticis,
Staet op en haest u mijn Vriendinne schoone,
En dient my doch met harten ghewis,
Wel edele Maeghdekens seer coene,
So sult ghy hebben een eeuwigh loone,
| |
[Folio B7v]
| |
Voor alle uwen benautheyt swaer,
Nu bidt ick u o Maeghden schoone,
Ontfanght dit voor een nieuwe Jaer.
Een saligh Jaer // O Maeghden eerbaer
Wensch ick u leet // deur onsen Heer
Dus bidt ick voor mijn // o Maeghden fijn
Want ick niet anders en begheer.
Maeghden net // leeft onbesmet,
En soeckt gheen eer // dan Godt den Heer.
Nota, Merckt. |
|