Een Nieu geestelijck liedt-boecxken
(1618)–Anoniem Nieu geestelijck liedt-boecxken, Een–
Auteursrechtvrijinhoudende veel nieuwe Liedekens, die welcke noyt in druck en zijn gheweest
[Folio B4v]
| |
IN Jesus Naem ghepresen,
So laet ons singhen met herten claer,
En laet ons danckbaer wesen,
Al in dit soete nieuwe Jaer:
Die almoghende Vader Godt den Heer,
Die boven alle Hemelen hoogh is verbreyt,
En gheeft Godt den Sone oock sijn eer
Die ons verlost heeft door zijn edel Lichaem teer,
En door zijn bloet bereyt,
Ons saligheyt.
O Jesu Christi verheven,
Wy bidden u met groot ootmoet
Dat ghy ons gratie wilt gheven,
Om u te dancken met herten goet,
Voor alle die Edele weldaden schoon,
Die ghy ons hebt ghedaen uyt liefden claer,
Ghy quaemt al uyt des Vaders troon,
Ghy hebt gehangen voor ons aen den Cruyce-boom
Om onse zonden swaer,
Te verwinnen daer.
In grooter armoeden,
Bent ghy ghebooren dat is waer,
Ghy hebt u laten voeden,
Van Maria de reyne Maghet claer,
Ghy hebt gheleghen in den stal
Al by Beesten met so groot ootmoet,
Ghy hebt gheroepen over al
Comt doch tot mijn groot ende daer toe smal,
Ick heb u door mijn bloede root,
Verlost alle van de doodt.
Wat heeft hy al gheleden,
Van hitte coude en arbeyt,
Hoe heeft hy oock ghestreden
Doem hem zijn Cruyce was bereyt,
| |
[Folio B5r]
| |
Wat bitter lijden fel ende wreet,
Hoe bangh benout so was zijn herte bloot
Al aen den Bergh van Oliveet
Daer heeft hy Water ende Bloet ghesweet
Door 'tvoorsien van zijn doot,
Om sijn swaer lijden groot.
Ten heeft hem niet verdroten,
Te lijden alle pijne swaer,
Eerst heeft hy zijn bloet vergoten,
Al is de besnijdenisse swaer,
Hy is verraden en ghevaen
Gegeesselt ende gecroont voor onse misdaet
Hy heeft zijn bloet uyt liefde belaen
Voor ons al uyt zijn zijde laten gaen,
Hy is voor onse zonden quaet,
Ghecruyst door valsche raet.
Hoort toe ghy Hemelen schoone
Hoort toe ghy Aerde met sinnen swaer,
Gheeft hem danckbaerheyt te loone
Alle Creatueren int openbaer,
Ghebenedijt met den Heere mee,
O alle Visschen, en Wateren claer,
Ghebenedijt hem mee, ghy haghel en snee,
Ghebenedijt hem oock ghy woeste Zee,
Ende ghy Berghen swaer,
Ghebenedijt hem voorwaer.
Ghebenedijt de Heere,
Alle hemelsche crachten hier ter stee,
Danckt hem ende looft hem seere,
Ghy winden en ghy wolcken mee,
Ghebenedijt den Heere voorwaer,
Ghy Son, ghy Maen, en oock ghy sterren schoon
Ghy Velden en ghy bloemen claer,
Ghebenedijt hem oock int openbaer,
| |
[Folio B5v]
| |
Gheeft hem danckbaerheyt te loon,
O alle aertrijcken schoon.
O Moeder Gods ghepresen,
Maria reyne Maghet claer,
Wilt voor ons danckbaer wesen,
V Soon Godt, ende mensch voorwaer
En danckt voor ons altijt den Heer,
O alle Engelen door minnen brant
Confessoren Martelaren seer,
Ghy Maeghden danckt altijt voor ons den Heer
O alle Heylighen vayliant
Doet ons bystant.
Oorlof mijn Broeders by desen,
Mannen ende Vrouwen minjoot,
Laet ons doch danckbaer wesen
Jesus weldaden die zijn seer groot,
En zijn ghenaden zijn seer veel
Dat hy uyt liefden door ons heeft ghewracht
Dus laet ons roepen uyt onsen keel
Wy dancken u, o Jesus al gheheel
Voor alle deughden wel gheacht
Die ghy hebt voor ons volbracht.
B. M. J. H. |
|