Nieu groot Amstelredams liedt-boeck

Inhoudende Alderhande Tafel, May, ende andere Amoureuse Liedekens seer vermaeckelijck voor alle Ionge Lieden

[Vvt liefden siet // lijd ick verdriet]

Op de voyse: Alst begint.

Vvt liefden siet // lijd ick verdriet
Ick en mach nu niet // uyt spreken
Hoe dat sy hier, die myn hart doorschiet
Twelck Venus heeft deursteken.

Noyt smart so groot, als desen doot,

Wie sou den cloot, gheraken
Reyn roosken root, troost my tis noot
Eer ick den doot sal smaken.

Ick ben deurwont // zijt dees oorcont

In shartsen gront // met lyden,
Nochtans haer mont // haer borstkens ront
Connen my terstont verblyden.

In swerelts troon, door haren toon

Spant sy de croon // der vrouwen,
In desen hon, haer dienaers loon,
Wie sou de schoon, betrouwen.

:iefs woorden soet voor ghelt of goet,

Want Lief by Lief moet blyven,
Noch vintmen goet, dat troosten moet
Twelck Liefde doet verdryven.

Maer dees kerssou, daer ick op ben

Ia by gheen vrou te ghelijcken,
Derf ickse nou, ick sterf van rou,
Schoon Lief u trou moet blijcken.

Laet hope myn, vertrooster zijn

Schoon Rose-mareyn ghepresen,
Gheeft medecijn, eer ick verdwijn
So is myn pijn ghenesen.

Maer weyghert zyt, gheen meerder spijt

Mijn hart dat splijt, deurt derven:
Vermaledijt sy, uer of tijt
Ick roep en crijt om sterven.

Eerst haer behaecht, eer ghy liefd’ draecht

Haer sin ghevraecht, met smeecken
Ick heb ghewaecht, t’sy God gheclaeght,
Dus hoort de maecht, eerst spreken.

[p. 149]

 

Loopt niet verblint, al teghen den wint

 

Oock niet en mint nae ooghen

 

Maer wel versint eer ghy begint

 

Of ghy vint, u bedroghen.

 

Princesse reyn siet int ghemeyn

 

Ick blijf alleyn, in smarte,

 

Ick prijs dat greyn in swerelts pleyn

 

Sy blijft certeyn int harte.

 

Sy is eerbaaer, haer oochskens claer

 

Al sonder maer, gescheyden

 

Een uer van haer, is duysent Iaer

 

Het Block valt swaer te slepen.