Nieu groot Amstelredams liedt-boeck


[Een Venus dier]
Op de voyse: Den tijt is hier, datmen sal vrolijck wesen. Een Venus dier Heb ick int hart vercoren Schoon van manier Van praet, en staet eerbaer, Daer soet bestier, comt my dicwils te vooren, dus int vyer, verbrand der minnen gaer Want openbaer // is haer myn hert bekent Dies als sy nu blijckt dach aen dach Die lieflijck eertijts vry aensach My comt ontrent, Haer oochskens van my went. Is sy verstoort, om dat ick haer beminne Sy spreeckt een woort En doet haer wil verstaen Ick sal my voort // alleyn nae haren stane Door dit accoort, gheheel te buyten gaen En my voortaen, regeeren na haer sin, Met een beleeft en fier, ghelaet Daer dienen goedertier // om baet Tot dat ick win, haer die ick bemin. Maer sy swijcht stil Dus moet ick duldich draghen Teghen myn wil, dit lyden en verdriet Sonder geschil, soud’ ic doen haer behagen Dat het ghevil, dant ick eens hadd’ bespiet Haer wil, is niet, want sy t’bidden veracht Dus wilick ghestadich minnen // al Op hoop, dat ick verwinnen // sal, Dat ic verwacht, op trouwe dach en nacht Princes ydoon, wilt nu u sinnen keeren Tot een persoon, die u van herten mint Al zyt ghy schoon Gheeft hem alt’ants in eeren Met troouwe loon, die t’uwaert is ghesint Maect dat hy wint, u liefd’ die liefd’ betoont Verdrijft zijn smert met reden // soet
[pagina 120]
En dat hy heeft ghebeden // doet Sijn diensten loont // en liefd’ met minne croont