Nieu groot Amstelredams liedt-boeck

Inhoudende Alderhande Tafel, May, ende andere Amoureuse Liedekens seer vermaeckelijck voor alle Ionge Lieden

[Bedroefde hartken wat moet ghy lyden]

Op de wijse: Als begint ofte Mijn oochkens weenen.

Bedroefde hartken wat moet ghy lyden
Die verloren heeft zijn soetelief
Onghetroost tot allen tijden
Die hy hooch al in zijn hart verhief

En heeft haer altijt eer bewesen

Boven eenich Vrou ter werelt wijdt
Maer door een ander wort ghy mispresen,
Geeft selfs ghetuyghenis wie dat ghy zijt.

Moet sy niet wesen straf van natueren

Dat sy haer liefken laet desolaet,
Ick seg ten zijn geen Venus cueren
Dat sy haer oochkens op een ander slaet.

Den vyant is teghen vrienden en magen

Die verlaten heeft die haer bemint
Om een diet harteken geheel doet knaghen,
Hy is veracht, die eens was haer vrient

Ben ick niet rijck van grooter machte

Of mijn wesen van ghedaente slecht
Aenmerckt mijn liefde van grooter crachte
Of soeckt ghy t’goet dunck my onrecht

Soo set ick Venus al op een sije

Met Cupido wil ick spaceren gaen,
Mijn liefken soecken een ander partije
Om t’groote geest, soo ist haer al ghedaen.

O hart neemt moet wilt u verkloeken

Al plecht ghy eens int hart te staen
Wy willen elders een ander soecken
Soo schoone wassender als daer vergaen

V Woorden licht soet van vrouwen

Die met alle winden waeyt
Ick en cost u dat niet toe betrouwen,
V liefde was in mijn hart ghesaeyt

[p. 109]

 

Gedenct schoon liefken dat ic u verhaelde

 

Dat vrouwen sinnen, so snellijck draeyt

 

Met schoone woorden ghy my betaelde

 

Ten soude niet zijn, of ic waer gepaeyt.

 

Heb ick misseyt buyten mijn weten

 

Daer ick u liefken mede heb verstoort

 

En wilt my daerom niet vergeten

 

Het waer mijn leet lief geeft confoort.

 

Soo mach ick te recht wel spreken

 

Dat u liefde moet seer wanckelbaer zijn

 

Soo recht misdaen en wort versteken

 

Des mijn hart leyt in grooter pijn

 

Had ic gheweten wat u harteken lusten,

 

Ick had gecregen waert in mijnder macht

 

Ick stel my selver in grooter onrusten

 

Voor dese loon en hadde ick niet gewacht

 

In wat ongelust ben ick gheboren,

 

Die ick bemin dat sy my haet,

 

Ick gunne haer deucht maer tis verloren

 

Want buyten reden worde ick versmaet.

 

Princesse valiant doet nae mijn rade,

 

So doet u lieveken die na u haeckt,

 

Besiet ghy u selve niet als die quade,

 

Hoe in liefden zijn hartcken blaeckt.