Nieu groot Amstelredams liedt-boeck

Inhoudende Alderhande Tafel, May, ende andere Amoureuse Liedekens seer vermaeckelijck voor alle Ionge Lieden

[p. 104]

Hier na volghen verscheyden nieuwe Amoreuse Liedekens:

[Alam, alarm alarme]

Op de wijse. Mocht ick gheluck verwerven.

Alam, alarm alarme
Vrou Venus trom die slaet
Nu salse ons wel ontfarme
T’sa vryers wt om baet
Al liept ghy aen beyd u beenen,
Te winter blauwe schenen
Coemt by malkaer, en kiest nu weer een aer

Comt oock wat met ons couten

Hier buyten int ghelach
Al die daer zijn ghesouten,
Op Vastakavonts dach
Die // is gaen kuypen
Die men die roept ons buyten
Haer laaf dat wast, daer noodse ons op te gast

Sy geeft niet veel te schransen,

Van alderhande fruyt, Maer fraye roose cransen
Van bloemen en ander cruyt
Met veel wellustich queelen
Van alle voghels kelen,
Vreucht in jolijdt, heeft nu zijn rechte tijdt

Al vele dinghen waerdich

Verblijen therte seer,
Maer een Princesken aerdich
Verblijdt my noch veel meer
Als haer bruyt oochken wincken
En soete woortgens clincken
Lieflick en fray, Dan isset altijt May.