Nieu groot Amstelredams liedt-boeck


Een Meyliedeken,
Op de voyse van den lustelijcken Mey. Den mey comt ons lieffelijck aen de baen // wort nu betreden, uyter steden, Van Minnaers die daer buyten gaen, Seer faen // volcht haer lieff meden // meest in vreden, Met harpen, luyten soet gheclanck Violoneen, Fluyten ende sanck Over dz schoon groen heye, Met desen coelen meye. Daer gaen geliefkens hant aen hant Opt lant // langs de Rivieren // so playsieren, Bevangen metter liefden brant, Playsandt // daer al de dieren // den Mey chieren, de Vischkens in het water soet Spelen daer met een bly ghemoet In die selve valleye, Met desen coelen meye.
[pagina 102]
Die Veldekens staen abondant Geplant // met Bloemkens reyne // int ghemeyne d’Amoureusen seer triumphant Vayllant // na de Fonteyne // in dat pleyne Treden sy dan // paer ende paer, Menich Iong’man, met zijn Lieff daer Sy plucken d’Acolye Daer in den coelen Meye. Menich Bloemken stater ghebloeyt Daer groeyt // in die landouwe // menich Karssouwe Zijnde met sHemels dou besproeyt Ooc vloeyt, dwater nouwe // schoon Ioncvrouwe Phebus gheeft alle cruyden kracht Aurora vochticht dach en nacht Tgewas in menigherleye Met desen coelen Meye. PRINCE Ghy Princelicke minnaers hoort Treet voort // condyse vinde // u beminde Maeckt met u tween een accoort. Oerboort // als wel ghesinde // onder een Linde Soo Amoreusen schuldich // zijn Wilt uwen tijt gheduldich // zijn Wie can, dat hy verbeye, Tot in den coelen Meye.