Nieu groot Amstelredams liedt-boeck
(1605)–Anoniem Nieu groot Amstelredams liedt-boeck–
AuteursrechtvrijInhoudende Alderhande Tafel, May, ende andere Amoureuse Liedekens seer vermaeckelijck voor alle Ionge Lieden
Op de wyse, Ick maeck gheclach, met reden op deser tijdtVryer.
Cupido wreet, hoe valt ghy my rebel
In liefden heet, doe ghy my groot ghequel
die ic heb vercoren, sy sou niet willen horen
Nae my dat weet ick wel
Vryster.
Hoe coemt dat by, isse u te hooch van staet
Verclaert het my, ick sal u gheven raedt
Wilt u liefde heur vertellen u selven dus niet quellen
Ghy sult vinden baet.
Vryer.
Wist ick certeyn dat sy my wou verstaan
Haer wou ic alleyn, mijn liefden van stonden aen
Wt jonstigher begeeren
Mijn liefde presenteren, met lieflijc vermaen.
Vryster.
Segt haer vry, ten mach haer schaden niet
Twas jammer dat ghy
Om haer quamet int verdriet,
Dus u doch wel versinnet, wie ist die gy beminnet
Swijght het teghens my niet.
Vryer.
Om dat ghij’t begeert
Dat ick het u verclaer, ghy zijt expaert
Myn hulp, myn troost voorwaer
Meught ghy my niet gebueren
Die doot sal ick besweren, dit seg ic u seer claer
Vryster.
Noyt meerder dangier
En quam int herte myn, dan ick nu hier
| |
[pagina 48]
| |
Van u op dit termijn, dus hout u doch verqueten
Ick salt oock niet vergeten
Dat ick bespot moet zijn.
Vryer.
O suyvere kersou
Ghy hebt mijn hart doorwondt,
Ic spot niet met jou, nu noch teeniger stont
Mach ic u niet verwerven van rouwe moet sterven
Dat seg ick u goet ront.
Vryster.
O jonghelinck goet
V claghen doch cesseert, u liefde doet
Dat myn hert tot u keert
Dus wilt my toevertrouwen, ic ben tot u gehouwen
Te doen dat ghy begheert.
Vryer.
Princesse reyn, ick danck u met ootmoet
Ghy zijt certeyn, die my in liefden voedt,
Ick sal van u niet wijcken, maer altijt laten blijcken
Ghetrou tot inder doot
Vryster.
Prince eerbaar, ick ben altoos bereyt
Soo voor als naer, te vryen u eerbaerheyt
En doen al u begeeren
Behouden mynder eeren
Dus weest van druck onseyt.
|
|