Nieu groot Amstelredams liedt-boeck


[Die Wijntgen my gheschoncken]
Op de wyse: Het was een goelic Meysken. Die Wijntgen my gheschoncken Breng ick myn naeste ghebuyr ’t Kan den gheest ontsoncken Drincktmense nae natuyr D’eele wijn, d’eele wijn, d’eele wijn Met maet ghedroncken, D’eele wijn is medecijn. Sy verdrijft fantasyen Maeckt dattet hert ontspringt Sy doet vrymoedich vryen, Dats, d’een om d’ander dingt, D’eele wijn, d’eele wijn, d’eele wijn Kan t’hert verblyen D’eele wijn is medecijn. Sy wil gheen nijders schouwen: Siet deur noch venster aen, Sy doet kennis vernouwen Soo wel de vrou als man, D’eele wijn, d’eele wijn, d’eele wijn Doet aen d’hande douwen, D’eele wijn is medecijn. Sy doet twee hertgens groeyen In een nae wil en lust, En doet begheerte vloeyen, Maeckt dat d’een d’ander kust, D’eele wijn, d’eele wijn,d’eele wijn Doet liefde bloeyen, D’eele wijn is medecijn.