Nieu groot Amstelredams liedt-boeck


Tafel-liedeken,
Op de wyse: Een oud houboligh boertgen sou eens uyt vryen gaan. Twee grove kinckel Boeren waren te gast ghenoot Hoe sy daer tsamen voeren Sal ick ontdecken bloot Een vast opset, maeckten sy net Als sy gingen daer heen met een Hoe sy te met Magher en Vet Souden kluyven vant Been. Ick sal wel dapper eeten Niet luttel drincken mee Als ick daer ben gheseten Sprack d’eene Boerman ree, Iae half en heel, sal door mijn keel Sluypen sprack dander daer voor waer Oock eeten veel jae die plateel Sal ick wel maecken claer. Doen sy daer beyde saten Als vrienden wel begast Sy droncken ende aten Daer worden soo ghebrast Dat sy terstont, den darm wel ront Creghen al metter vaert, beswaert Des Beeckers gront, na haer verbont Worden oock wel gheclaert. Prince ghingh op een scheyden Die maeltijt was ghedaen De Boeren haer bereyden
[pagina 36]
Om t’samen t’huys te gaen Elck gingh seer sat, met een vol vat Swieren al door den dijck, gelijck Het was seer glat, so dat sy plat Dickwils vielen tot slijck.