Nieu groot Amstelredams liedt-boeck

Inhoudende Alderhande Tafel, May, ende andere Amoureuse Liedekens seer vermaeckelijck voor alle Ionge Lieden

Tafel-liedeken

Op die wyse Ruyterken fier wat doet ghy hier, etc.

[p. 34]

 

VVyntgen ghy zijt wonderbaer

 

Ghy verheucht ons allegaer

 

In dese feeste:

 

dies dancken wy u voorwaer

 

Eel wijntgen claer.

 

Niet ghesonder dan die wijn,

 

Men vind gheen beter Medecijn

 

In dese feeste:

 

Sy verwreckt vreughd, verdrijft pijn

 

Lof moet haer zijn.

 

Die haer drinkt zijn smerte slyt

 

Vrees en sorch maeckt sy hem quyt

 

In dees feeste:

 

Door haer ist dat druck wech glyt

 

Al metter tijdt.

 

Prince.

 

Prins wilt ghy zijn heel verheucht,

 

En ghebruycken reyn gheneucht

 

In dees feeste:

 

Schickt dat ghy u tot haar veught,

 

wanneer ghy meught.