Nieu groot Amstelredams liedt-boeck

Inhoudende Alderhande Tafel, May, ende andere Amoureuse Liedekens seer vermaeckelijck voor alle Ionge Lieden

Tafel-Liedt,

Op de wijse, Alst begint.

Sullen wy dan noch lange treuren,
Wy hebben doch een vrye waert,
Wyn, bier, goet chier, t’mach ons ghebeuren.

Wat ghy verteert en wilt niet sorgen,

Want ongeneucht, gheen vreucht vermeert,
Laet heur, daer veur, sorghen die borghen.

Wel op laet eens die kroeskens clincken,

Wie weet wat onse beurs vermach,
Die spaert, end’ gaert, derf selfs niet drincken.

Laet garen, sparen, tot onser baten,

Die weeck duert ons maer eenen dach,
Wat baet, te laet, gout en Ducaten?

Wie sal ick dan hier me aenvaerden

Dat sal mijn naeste Buerman zijn,
Ho say hoe fray, is hy van aerden.

Ist kanneken uyt, laet weder tappen

De dranck verheucht het herte mijn,
Hoordy, tapt vry, sonder te clappen.

Dus willen wy dese Prins bedancken

Om dat hy ons so wel tracteert,
Dit zijn, hoort mijn, der gilden rancken