Nieu groot Amstelredams liedt-boeck


[Nu wil ick laten varen]
Op de wijse: Dat set ick op mijn handelijn Nu wil ick laten varen Druck, lyden uyt mijn ghemoet En drincken van den claren Die tharte verheughen doet Ter eeren die liefste, die liefste, die liefste Ter eeren die alderliefste mijn met vreuchden in deuchden Willen wy jonghe jeuchden By u hier vrolick zijn. Die croesken vol gheschoncken Bring ick een maechdeken fier Wiens oochskens op myn loncken Gants door der minnen bestier Waer voor ick haer jonnen, haer jonnen, haer jonnen Waer voor ic haer, jonnen veel vreuchden groot Als huyden, wy luyden In vrolickheyt beduyden Dat die bedroefde zijn door Laet comen Harpen, Luyten Fiolen, schalmeyen meest Redenrijckers, spelen, cluyten Van sinnen frap na den gheest Hy salt noch betalen, betalen, betalen Hy salt noch betalen diet niet en weet Laet sorghen, die borghen Wy scheyden niet voor morghen Al isset nijders leet. Ghesoden en ghebraden Brengt ons ter tafel laet, Pasteyen, taerten vladen Met alderhanden surcaet, Op dat wy ons lusten, ons lusten, ons lusten Op dat wy ons lusten moghen versaen Doet schincken, en drincken Wt schalen die blincken, den edelen Rijnschen traen Den Waert Princelijck vol eeren, Heeft ons met allen nu wel
[pagina 6]
Voldaen: maer sijn begheren Is dat wy niet opstel De liefste eens cussen, eens cussen, eens cussen De liefste eens cussen onverfoeyt Want sinnen, die minnen, verwecken doet van binnen Dat liefde in liefde bloeyt.