|
| |
Om dat Babels Dienaren (Gods volck) niet stilt te schelden: Maer dichten leughen Refereynen (als hypocrijten) Soo moetmense straffende, haer selfs quaedt vermelden:En heerlijck (met Schrift, als Christus) haer boosheyt verwijten.
| |
| |
Ghy Cains Broedtsele, ghy Aderen geslachte,
Ghy Baals dienaers, die den Antechrist wrachte,
Ghy Judas Zaet, ghy Deotrephissche gesellen,
Ghy Babels boeleerders, die de Hoere vercrachte,
Gy Sathans beschermsel, die Franciscus verdachte,
Ghy Afgodendienaers, ghy Draken der Hellen,
Schroemt, beeft, draecht rou, weent ende huylt, beghint te tellen,
De graden ws vals, o Ghy Nigromanceenen,
Want tis seer na by, dat v de heer wil quellen
Hem walcht de Offeranden, En Toouery met eenen:
Den tijt is haest hier, dat hy wil vercleenen
V Rijck met menschen handen, door grouwelicke plaghen:
Want so seght de Propheet: laet rusten sy die meenen,
Met haer heyrcracht te worgen, die Godt behaghen,
Ter laester tijt suldyt Lant in crygen met lagen,
Ghy sult haer t Zweert Bringhen, End Godt Pestilencie veruaert:
| |
| |
Hier met dreycht hy v Boose, ick moet v ghewaghen:
Babels Schelluynen, dect v cruynen,, ghy Judas aert,
Verberght v nou,, draecht vry rou, en laet groyen den baert.
 Ghy Pharaos Succedenten, die ons beschuldicht met moort:
Ghy Achitophels Pleghers, verre moet zijn gehoort
Ons onschult (van u), Maer v Moordadighen schijn
Roept Wraeck (inden Hemel) hoe gy d Onnosele verschoont.
Roemt vrij op den Coninck, en v Antechrist gestoort:
Wy hopen op den Leuenden Godt: Hangt met ghepijn:
Moordt, Worcht, ghy verleyders en wascht v handen fijn:
Jn tbloet der Gerechter, Soo ghy oock doet certeyn:
Tschaedt niet, tis Godt al bekent: Tsal haest vergolden zijn:
Want tgheschrey is voor Gods Ooren gecomen gemeyn,
Ten ginck Core, Dathan, noch Abiron noyt so onreyn,
(Alst v) Ghy Sodomijtsche Epicureen quaet,
| |
| |
Die teghen Natuere sondicht, Oock wt hoochmoet vileyn
Wel wetende wat recht is, dan om eygen baet,
Verraet en verjaecht gy op dat v schandelick gelaet
Niet kenlick wort: Maer Godt heuet de zijne verclaert,
Dus wacht ghy op Jesabels hulp, Maer ick geef v raet,
Babels Schalluynen, dect v cruynen,, gy Judas Aert
Verborcht v nou,, draecht vry rou, en laet groyen den Baert.
 Dect v Cruynen, draecht rou, en laet groeyen den Baert net,
Ghy Gheveynsde, Meyneedighe, en Ongheschoren met,
Die daer Vrede beloeft hadt: Maer tSweert opgeheuen,
Ghy roept Wraec ouer ons, Maer tverderuen onghelet
Met een eeuwich Knaghen,, der Conscientien besmet,
Coemt snel ouer v eygen, soot claer is beseuen,
Gy Pharaoos ghelijcke, die Vreed beloeft te gheuen
Als Gods thoren ouer v is, Maer dan werdt verwoet,
| |
| |
God noemt v dieuen, Moorders, Meyneedige Teuen:
Ja wil niet datmen Bidde voor sulc verstocte bloet;
Tfy, Schaemt v der sonden, dat ghijse op schrijuen doet,
Die uwen stinckende God Melis (daerin ghy vertrout)
(Niet eeren) En treedt so met voeten tBloet Christi soet,
Todt Teecken dijns Boosheydts, O ghy huychelaren stout.
Daer is doch gheen salicheyt, dan in (tBloet) menichfout
(Christi Jesu) Ghy Vipren, hoe ghi daer teghen haert:
Dus volcht raet, Wan dt ghi ontcommes niet, met gelt of gout!
Babels Schalluynen, deckt v Cruynen ghy Judas aert,
Verborcht v nou,, draecht vrij rou,, En laet groyen den Baert.
 Schaemt v ghy dwase, die op Princen hoept volheerdich:
Schaemt v boose, die steelt Christi Ghenade weerdich:
schaemt v Cooplieden, die vercoopt uwen Godt midts desen:
schaemt v Hoereerders, verbiedende
| |
| |
Schaemt v, die daer vervalscht het Doopsel rechtueerdich:
Schaemt v, die verbiedt d Woort Gods te singen oft lesen:
Schaemt v, ghy die den Paus eert, voor Christum ghepresen:
Schaemt v gy stomme houten beelden Honnoreerders:
Schaemt v, ghy die den Antechrist v hooft laet wesen,
Somma, schaemt, schrict, en beeft, al ghy boose Obedieerders,
Die daer consenteert, dat de Spaensche Boeleerders
Met v Wijuen en Dochters hoereren eenpaer.
Deckt ghy v Neusen, Ghy Gods Gemeynte verneerders,
Diens Eynde snel als een Valstrick sal comen met vaer:
Ghy sult Weduwe en Weese op eenen dach worden, Daer
Hoort ghy Leughenaers v Val, die ons met last beswaert,
Dus hooret of ghy wilt, Oft achtet vrij lichte, Maer
Babels Schalluynen, deckt v Cruynen ghy Judas aert,
| |
| |
Verborcht v nou, draecht vrij rou,, En laet groyen den Baert.
| |
Refereyn.
Gheslachte der Maechden van Antwerpen vercoren,,
Weent, roept laet hooren,, als nu ten tijen,,
V suster wort vercracht, die ghy hebt ghesworen
Sult ghy den thooren,, noch langhe lijen
Dat sy sal moeten leuen in Momboirdijen
Waer dore sy onteert wordt, en coemt in schanden,
Midts twee loose schalcken, die haer comen bestrijen
Sy willen haer secreten, hebben in Handen,
Ten is noyt gesien, hier in dese Nederlanden
Dat ander vreemde haer soude regeren,
Haer rechte Momboirs zijn wech, en sommige in Banden
Die haer wel plochten te gouuerneren,
Doen sachmense blijdelick triumpheren
Maer nu sidtse in druckighen versere
Om dat haer twee vreemde Momboirs willen violeren,
Eylacen dees Maecht, verliest schier gants haer eere.
Dese twee vreemde Momboirs, wilt hier wel op letten
Onteeren en verpletten, dit Maechdeken minioot
Sy ontsuyueren haer cleet, met onreyne smetten
| |
| |
[Al]ree sy haer setten metten borsten bloot,
Sy hebben haer genomen de Croone vant hoot,
[D]at noyt Keyser en dede, noch Coninck reene,
Sy grauen haer een gheuanckenisse groot
[D]aer sy haer geslachte in willen brengen ghemeene,
[O]m datse souden regeren haer goet alleene,
[D]enckt hoe datse met dees maecht nu leuen
[S]eyt daer yemant tegen die coemt in weene,
[D]us wordt haer goedt den vreemden ten besten gegeuen,
[H]aer Maechschap wort hier wten Lande ghedreuen
[W]onder bedrijuen dese twee vreemde in elcken keere,,
[T]en was geen noot, hadder eendracht gebleuen
[E]ylacen dees Maecht, verliest schier gans haer eere.
Verliest sy niet haer eere, en lijt torment onsachte,
[N]iettemin haer gheslachte,, wort oock gedreycht en ghequelt,
[S]y beginnen schier te brenghen, groot en cleyn van machte
[D]ese gheachte,, tgeweer in hen ghewelt,
[J]ae bouen dien noch een groote somme van ghelt
[O]p alle tghene datmen ter merckt souw moghen halen,
| |
| |
Sal worden accijse end Jmpost gheste[lt]
Antwerpia Maecht, hoe sietmen v nu d[alen]
Ghy die vermaert waert, in swerelts p[alen]
Voor die schoonste, Rijcxste sonder blama[tie]
Nu sidy subject onder die v doen dwale[n]
En veriaghen van v schier elcke nacie
Suldy noch langhe lijden dese temptac[ie]
Jck hoepe neen, al wort v cracht seer te[ere]
Dies ick beclaghe v perturbacie,
Eylacen dees Maecht, verliest schier g[ans] haer ee[re.]
Princersselicke Maecht Maechdeli[jcke] Karssouwe
Jck hoepe uwen rouwe,, sal haest wes[en] volendt,
Ghy wordt vertroost als Susanna de[er]baer vrouwe,
De Daniel ghetrouwe inden noot was [pre]se]nt]
hoe wel sy verwezen was tot sdoots torm[ent]
Denckt oft ghy oock todt steruens wa[ert] verwesen,
Den seluen Godt leeft noch omnipote[nt]
hy sal uwen druc door eenen Daniel gene[sen]
Tgheweldt der vreemden reyn Maec[ht] wtghelesen,
Wort v versoet door v vrienden voorwa[er]
En comen v ter hulpen en noch by desen
Sult ghy hebben,, en hooren Deuang[elie] claer,
Alle tghene dat v ghenomen is int voor[leden] Jaer.
[C]an v weder gheuen dalmoegende Heere
Betrout dat vastelijck, reyn Maecht eerbaer
So blijft ghy als vore vernieut in v Eere.
|
|
Auteursrechtvrij