Een nieu Guese liede boecxken
(1576)–Anoniem Een nieu Guese liede boecxken–
Auteursrechtvrijop de wijse, Swinters Somers euen groen.Christelicke Broeders hier beneuen
Soeckt nu v salicheyt met vlijt
Wilt na des heeren woort nu leuen
So meucht ghy eewich zijn verblijt
Want de Tyrannen zijn verbeten
Die ons vervolch deden aen
D Afgoden Beelden zijn om gesmeten
Dat heeft die Viuelegeus ghedaen.
| |
[Folio 129r]
| |
Papen en Monicken moeten nu lopen
Alsoot nu blijckt int openbaer,
Die haer Verdiensten plegen te vercopen
Voor haer en quam noyt droeuer maer
Gods volck plegen sy te vernielen
En deen haer in speloncken gaen
Nu loopen sy selfs met kackhielen
Dat heeft die Viuelegeus gedaen.
Metten en Vesperen wilt hier op gissen
Die zijn nu heel ter neder gheuelt
Completen, Vigilien, ende Missen
Daer sy af ontfinghen vele ghelt
Twert haer nu te rechte vergouwen
Seuenvout na Dauids vermaen
Men geeft nu oock geen gelt van Trouwen
Dat heeft die Viuelegeus ghedaen.
O lieue Ghecapte ende Gheschoren
Hoe ist met v nu dus verkeert:
Datmen v hier niet meer en wil hooren
Hoe wel ghy zijt gesalft, gesmeert
Men plach v goeden dach te bieden
Op de Marckt int openbaer plaen
Nu moet ghy wt v vette keuckens vlieden
Dat heeft de Viuelegeus ghedaen.
V leering en is niet Gods woort puere
Die ghy dus lang hebt voorgestelt
Daerom wortse nu na de Schriftuere
Wtgheroyt al met ghewelt
Het volck en wil niet meer aenbeden
| |
[Folio 129v]
| |
Jan Melis inde halue Maen
Hy is certeyn met voeten getreden
Dat heeft de Viuelegeus ghedaen.
Prinslicke Papen, papisten allegader
Jck rade v na mijn beste verstant
Loopt en bidt tot de Paus v vader
Dat hy de Geusen int Nederlant
Jnden Ban wil doen op alle dese plecken
Oft sy sullen v noch stellen op Raen
Het volck dat acht v nu voor ghecken
Dat heeft de Viuelegeus ghedaen.
|
|