Een nieu Guese liede boecxken
(1576)–Anoniem Een nieu Guese liede boecxken–
Auteursrechtvrijop de wijse: Wilhelmus van Nassouwe.Vvilt nu vreucht bedrijuen
Ghy steden in Hollant,
Jn Zeelant Mannen en Wijuen,
Bedrijft vreucht aen elcken cant,
Ter eeren den Prince verheven
Sijn huysvrou Edel vermaert,
Datse God gratie heeft ghegheven
En trouwelick bewaert.
| |
[Folio 107r]
| |
Ten Briele is sy ghecomen
Al met triumphe groot,
dat hebben die Burghers vernomen
Men schoot so menighen schoot,
den Prince tot zijnder vromen,
Men nam haer byder hant
Men hiet haer willecomen
Al in des Princen Lant.
Als den Prins dat heeft vernomen,
Van herten was hy verblijt,
Hy voer al sonder schromen,
Naer den Briel seer subijt,
Naer haer was zijn verlanghen,
den Edelen Prince goet
hy heeft zijn Bruydt ontfanghen
En vriendelick gegroet.
Men sach daer vreucht oorboren
Ten Briele, ick seght v plat,
Tromlen en trompetten mochtmen hooren
Op het hooft en in die stadt,
Tgheschut wert los gheschoten
Ter eeren die Bruydt minioot,
Ten heeft haer niet verdroten
Te schieten soo menighen schoot.
Als sy binnen is ghecomen,
die Jonckvrou reyn ghemaniert,
Elck hiet haer willecomen
Vreucht wert daer gehantiert,
Op den Toren sachmen vieren
| |
[Folio 107v]
| |
Deur die stadt nacht en dach,
Met lieflicke manieren
Men hoorde daer gheen gheclach.
Van daer is sy ghetoghen,
Naer Dort al metter spoet,
Alsoomen sach voor ooghen,
God die heeftse behoedt,
Trompetten ende Claroenen
Gauen daer groot geluydt,
Elck een sachmen daer spoeyen
Om te eeren des Princen Bruyt.
Die van Dort cloeck van aerde
Die waren haest bedacht,
Want sy gheen cost en spaerden
Maer hebben de Bruyt verwacht,
Die schutters sachmen treden
Met Vendels wijt ontdaen,
Coragieus van zeden
Om die Bruyt te ontfaen.
De Burghers met verlanghen
Liepen daer buyten die Poort
Om die Bruyt eerlick tontfanghen,
Tgheschut wert daer ghehoort,
Men sach Pecktonnen branden,
Door die stadt hier en daer,
Alle die Papisten ter schanden
Ter eeren den Prins eerbaer.
Die Heeren vander steden,
Schout schepenen wel ghemoet,
Burghemeesters en schutters mede,
| |
[Folio 108r]
| |
Die quamen haer int ghemoet,
Met Vendels wijdt ontloken,
seer lustich triumphant,
En hebben seer vriendelick ghesproken,
Weest willecoem in Hollant.
Dus wilt doch vreucht hantieren
Ghy steden aen elcken cant,
En wilt doch vrolick vieren
Ter eeren den Prins vaeliant,
Danckende Godt verheuen
Van dat Babel soo wort verstoort,
En dat hy ons heeft ghegheuen
Zijn heylighe Godlick Woort.
Ghy moecht v wel verblijden
Ghy steden hooch vermaert,
Want noyt tot gheenen tijden
En waert ghy also bewaert,
Met sulcken Edelen Heere
Ende een Princesse so goet
Want sy beyde voor Christus leere
Willen waghen lijf en goet.
Laet ons den Heere dancken
Ghy Menschen groot en cleyn,
Hy sterckt ons arme crancken
Alsmen mocht sien ghemeyn
Te Leyden voor de stede,
Was den vyant seer verbaest,
Ende t Alckmaer oock mede,
Daer ruymden hy metter haest.
| |
[Folio 108v]
| |
Oorlof Prinslicke Heeren,
Wilt dit in danck ontfaen,
Den Prins van Oraengien ter eeren
So is dit Liet ghedaen,
Met sijn Princesse verheuen
Godt spaerse beyde ghesont,
En wilse lang laten leuen
Bid ick met tshertsen gront.
|
|