Een nieu Guese liede boecxken

[fol. 61v]

Een nieu Liedeken,

op de wijse. Te Mey als alle Vogelen, etc.

Hoort toe ghy menschen nu ter tijdt,
Ghy die den spaengiaert goet gunstich zijt,
Ghy wenscht hem alle vreden,
Meynt ghy daer door te wesen beurydt,
Of hy quam binnen v steden.

Sijt ghy so slecht man ende vrou,
Meynt ghy dat v dat profiteren sou
Datmen v Catholijcken noemen:
So neemt exempel aen Bossou,
Die in Rotterdam is ghecomen.

Hy nam de stadt in zijn ghewelt,
Wien heeft hy van ghelooue vermelt,
Oft na gheloof doen vraghen?
Maer hy heeft de Lieden neder ghevelt,
Doorschooten en doorslaghen.

Spiegelt v aen Mechelen in Brabant,
Sy quamen met ongewapender handt
Den Spaeniaert te gemoet gegangen,
Sy droeghen Processie triumphant,
Wat loon hebben die ontfangen.

Sy worden verslaghen, al waren sy coen
Die Burghers waren in dit saysoen
Vol suchten ende treuren:
Alsulcke Gracie ende Pardoen
Soude v Catholijcken gebeuren.

Te Zutphen, hoort wel na mijn vermaen,
Daer quam den spaeniaert binnen gaen,

[fol. 62r]

 

Met also corten spacy

 

Gincmen de lieden met sweerden verslaen

 

Was dit niet schamele gracy

 

 

 

Sy quamen voor Naerden metter spoet,

 

Tien Burgers vielen don Frederic te voet

 

Die hem om gracy baden:

 

Jck sal v doen (sprack hy verwoet)

 

Ghenade, ende geen ghenaden.

 

 

 

De Borghers hadden noyt sulcx gehoort

 

Geen verstant en haddense wt dit woort,

 

Eer de stadt was opgegeuen,

 

Doe werden aldaer de Mannen vermoort

 

De vrouwen liet hy meest leuen.

 

 

 

Te Assendelft hoort men de liede clagen,

 

Sy spraken: wy Geusden noyt onse dagen:

 

Hoort wat de Spaengiaerts seyden,

 

Daerom willen wy v sielen ten Hemel dragen

 

Eer v die Geusen verleyden.

 

 

 

Hierom ghy Burgers hier wel op past,

 

En stelt v niet in sulcken last,

 

En laet v niet bedrieghen

 

Een Spaens Pardoen dat hout so vast,

 

Als een open hant vol Vlieghen.

 

 

 

De stadt van Alckmaer wijs bedocht,

 

Die en heeft gheen Spaens Pardoen gecocht

 

Daerom was sy beleghen,

 

Oock eenen storm daer voor gewrocht,

 

Godt danck noch onuercreghen.

 

 

 

Ghy die onsen Prins wilt hebben verdreuen,

[fol. 62v]

 

Soudt ghy lieuer den Tienden Penninck gheuen

 

Js dit al v verlanghen?

 

Ducdalue v beminde Neue

 

Die wilse gheern ontfanghen.

 

 

 

Of wildy v selfs tot eygenschap keeren,

 

Daer en derft ghy gheen spaens om leeren,

 

Treckt liever in Westphalen,

 

Daer wilmen wel eyghen slauen begeeren,

 

Men spreecter duytsche talen.

 

 

 

Oorlof ghy Burgers fijn en oprecht

 

Al wat v den Spaengiaert toesecht,

 

Oft wat sy v gheloeuen,

 

Dat houden sy ghelijck een Hont zijn echt,

 

Wacht v van sulcke Boeuen.